Xorazmda voyaga yetmagan qizlarni uyida saqlab, ularni fohishalik qilishga majburlab kelgan ayol qo‘lga olindi. Bu haqda IIV Transportda xavfsizlikni ta’minlash bosh boshqarmasiga tayanib, “Yuz.uz” xabar berdi.
Ma’lum qilinishicha, 2-fevral kuni Xorazm viloyati IIB TXTB boshlig‘i nomiga R.M. ismli ayol yosh, voyaga yetmagan qizlarni uyida saqlab, fohishalik bilan shug‘ullanishga majburlayotgani to‘g‘risida ariza kelib tushgan. Shuningdek, arizada u qizlarni bir necha kunga boshqa viloyatlarga 1000-1500 AQSh dollariga doimiy ravishda sotib yuborayotganligi ma’lum qilingan.
Arizaga muvofiq tezkor tadbir o‘tkazilgan. Tadbirda 1989-yilda tug‘ilgan, Urganch shahrida yashovchi R.M. shartli xaridor sifatida jalb qilingan M.M.ga 2002- va 1999-yilda tug‘ilgan ikki qizni 7 kunga Samarqand viloyatiga fohishalik qilib kelish uchun 1400 dollar evaziga sotib, Xazorasp bekatida M.M.dan pullarni olayotgan vaqtida qo‘lga olingan.
Mazkur holat yuzasidan fuqaro R.M.ga nisbatan Jinoyat kodeksning 135-moddasi (odam savdosi) 2-qismi “b” bandi bilan jinoyat ishi qo‘zg‘atilgan. Hozirda tergov harakatlari davom etmoqda.
Avvalroq Toshkent xalqaro aeroportida qizlarni Turkiyaga fohishalikka yuborgani uchun 8 yilga qamalib, afv etilgan ayol yana shu jinoyati uchun ushlangani to‘g‘risida xabar berilgandi.
Izoh (0)