Sodiqlik haqida gap bo‘lishi mumkin emas! “Barselona”da ham, “Real” safida ham o‘ynagan futbolchilar

Ispaniyada yiliga eng kamida ikki marta shunday voqea bo‘ladiki, u deyarli butun futbol olamini ikkiga bo‘lib yuboradi. Bu azaliy raqiblar “Real” va “Barselona” to‘qnashuvi, boshqacha aytganda “El-Klasiko” bo‘lib, aynan ushbu ikki jamoa qarama-qarshiligini millionlab muxlislar intiqlik bilan kutadi. O‘yinning o‘zi, undagi to‘qnashuvlar va har ikkala jamoa muxlislarining hayqiriqlarini-ku ortiqcha ta’riflamagan ma’qul. Har qanday jamoadan qabul qilingan mag‘lubiyat kechirilishi mumkin, biroq “Real” yoki “Barselona”ga imkoniyat boy berilsa, yutqazgan jamoa keyingi o‘yinda, albatta, revansh olishi kerak bo‘ladi. Shunday ekan, aksariyat futbolchilar bir marta bo‘lsa-da “El-Klasiko”da o‘ynashni orzu qiladi. Ammo yana shunday o‘yinchilar ham borki, ular ham “Barselona” ham “Real” safida to‘p surishga muvaffaq bo‘lgan. Quyida aynan mana shunday mashhur futbolchilar haqida fikr yuritamiz.

Luish Figu

Portugaliyalik futbolchi 2000-yilda “Barselona”dan “Real”ga o‘tganidan so‘ng kataloniyalik muxlislar uni shu darajada yomon ko‘rib qoldiki, Figuning o‘zi ham jamoasini o‘zgartirganiga afsuslangan bo‘lsa ajab emas. Figu “Barselona”da yetakchilardan biri bo‘lgan va uni u yerda barcha qadrlardi, biroq u klubni ogohlantirmay “Real”ga o‘tib ketadi. Uni bunga nima majbur qilgani va unda bunday qilmaslik imkoniyati bormidi kabi savollar esa alohida to‘xtalishga arziydigan mavzudir. Figu “Real” bilan “Barsa” maydoniga tashrif buyurganida esa muxlislar shunchaki unga o‘ynash imkoniyatini bermasdi. Portugaliyalikning har bir harakati hushtak bilan qarshi olinar, maydonga esa turli buyumlar uloqtirilardi. Hatto irg‘itilgan narsalar orasida cho‘chqa kallasi ham bor edi. Umuman olganda, Figu har ikkala jamoa safida ham yetarli darajada yorqin o‘yinlar ko‘rsata olgan. Biroq uning bu ishini “Barselona” muxlislari hech qachon kechirmaydi.

Ronaldo

Braziliyalik hujumchi Figu duch kelgan qiyinchiliklarga duchor bo‘lmagan. “So‘yloq” 6 yillik farq bilan ikki Ispaniya grandlari safida o‘ynagan. U 1996/97-yilgi mavsumda “Barselona”da ajoyib natijaga erishgach (34 o‘yin, 37 ta gol), “Inter”ga yo‘l oladi. Faqat 2002-yilga kelibgina u “Real”ga ko‘chib o‘tadi. Tan olish lozim, 2007-yilgacha “qaymoqranglilar” sharafini himoya qilgan Ronaldo Madridda “Barselona”dagi kabi samarali harakat qilolmaydi.

Samyuel Eto’O

Kamerunlik hujumchi ham o‘z vaqtida ikki ispan grandi safida o‘ynashga muvaffaq bo‘lgan. Samyuel 16 yoshida “Real” tizimiga keladi, ammo 3 yil ichida asosiy jamoada o‘z o‘rnini topa olmaydi. Shundan so‘ng hujumchi ma’lum muddat “Malyorka”da to‘p suradi va u yerda o‘zini yaxshi tomondan namoyon qila boshlaydi. Shu tariqa u “Barselona” skautlari nazariga tushadi. Natijada, Eto’O Kataloniya jamoasining afsonalaridan biriga aylandi. U “Barsa” tarkibida 145 o‘yinda 108 marta raqib darvozasini ishg‘ol qilgan.

Luis Enrike

Hozirda Ispaniya termasini boshqarayotgan “Barselona” sobiq murabbiyi Luis Enrike ham har ikkala klubda o‘ynashga ulgurgan. 1991—1996-yillarda “Real” sharafini himoya qilgan Luis Enrike madridliklar bilan maosh borasida kelisha olmay qoladi va jamoaning azaliy raqibi bilan yashirincha muzokaralarni boshlab yuboradi. Natijada futbolchi “Real” bilan shartnomani uzaytirmaslikka va erkin agent sifatida “Barselona”ga o‘tishga qaror qiladi. Agar Enrike “Real”da 157 o‘yin o‘tkazib, 15 ta gol urgan bo‘lsa, “Barselona”da 207 bahsda maydonga tushib, o‘z hisobiga 73 ta gol yozdirib qo‘yadi.