Содиқлик ҳақида гап бўлиши мумкин эмас! «Барселона»да ҳам, «Реал» сафида ҳам ўйнаган футболчилар

Испанияда йилига энг камида икки марта шундай воқеа бўладики, у деярли бутун футбол оламини иккига бўлиб юборади. Бу азалий рақиблар «Реал» ва «Барселона» тўқнашуви, бошқача айтганда «Эль-Класико» бўлиб, айнан ушбу икки жамоа қарама-қаршилигини миллионлаб мухлислар интиқлик билан кутади. Ўйиннинг ўзи, ундаги тўқнашувлар ва ҳар иккала жамоа мухлисларининг ҳайқириқларини-ку ортиқча таърифламаган маъқул. Ҳар қандай жамоадан қабул қилинган мағлубият кечирилиши мумкин, бироқ «Реал» ёки «Барселона»га имконият бой берилса, ютқазган жамоа кейинги ўйинда, албатта, реванш олиши керак бўлади. Шундай экан, аксарият футболчилар бир марта бўлса-да «Эль-Класико»да ўйнашни орзу қилади. Аммо яна шундай ўйинчилар ҳам борки, улар ҳам «Барселона» ҳам «Реал» сафида тўп суришга муваффақ бўлган. Қуйида айнан мана шундай машҳур футболчилар ҳақида фикр юритамиз.

Луиш Фигу

Португалиялик футболчи 2000 йилда «Барселона»дан «Реал»га ўтганидан сўнг каталониялик мухлислар уни шу даражада ёмон кўриб қолдики, Фигунинг ўзи ҳам жамоасини ўзгартирганига афсусланган бўлса ажаб эмас. Фигу «Барселона»да етакчилардан бири бўлган ва уни у ерда барча қадрларди, бироқ у клубни огоҳлантирмай «Реал»га ўтиб кетади. Уни бунга нима мажбур қилгани ва унда бундай қилмаслик имконияти бормиди каби саволлар эса алоҳида тўхталишга арзийдиган мавзудир. Фигу «Реал» билан «Барса» майдонига ташриф буюрганида эса мухлислар шунчаки унга ўйнаш имкониятини бермасди. Португалияликнинг ҳар бир ҳаракати ҳуштак билан қарши олинар, майдонга эса турли буюмлар улоқтириларди. Ҳатто ирғитилган нарсалар орасида чўчқа калласи ҳам бор эди. Умуман олганда, Фигу ҳар иккала жамоа сафида ҳам етарли даражада ёрқин ўйинлар кўрсата олган. Бироқ унинг бу ишини «Барселона» мухлислари ҳеч қачон кечирмайди.

Роналдо

Бразилиялик ҳужумчи Фигу дуч келган қийинчиликларга дучор бўлмаган. «Сўйлоқ» 6 йиллик фарқ билан икки Испания грандлари сафида ўйнаган. У 1996/97 йилги мавсумда «Барселона»да ажойиб натижага эришгач (34 ўйин, 37 та гол), «Интер»га йўл олади. Фақат 2002 йилга келибгина у «Реал»га кўчиб ўтади. Тан олиш лозим, 2007 йилгача «қаймоқранглилар» шарафини ҳимоя қилган Роналдо Мадридда «Барселона»даги каби самарали ҳаракат қилолмайди.

Самюуэль Это’O

Камерунлик ҳужумчи ҳам ўз вақтида икки испан гранди сафида ўйнашга муваффақ бўлган. Самюуэль 16 ёшида «Реал» тизимига келади, аммо 3 йил ичида асосий жамоада ўз ўрнини топа олмайди. Шундан сўнг ҳужумчи маълум муддат «Мальорка»да тўп суради ва у ерда ўзини яхши томондан намоён қила бошлайди. Шу тариқа у «Барселона» скаутлари назарига тушади. Натижада, Это’O Каталония жамоасининг афсоналаридан бирига айланди. У «Барса» таркибида 145 ўйинда 108 марта рақиб дарвозасини ишғол қилган.

Луис Энрике

Ҳозирда Испания термасини бошқараётган «Барселона» собиқ мураббийи Луис Энрике ҳам ҳар иккала клубда ўйнашга улгурган. 1991—1996 йилларда «Реал» шарафини ҳимоя қилган Луис Энрике мадридликлар билан маош борасида келиша олмай қолади ва жамоанинг азалий рақиби билан яширинча музокараларни бошлаб юборади. Натижада футболчи «Реал» билан шартномани узайтирмасликка ва эркин агент сифатида «Барселона»га ўтишга қарор қилади. Агар Энрике «Реал»да 157 ўйин ўтказиб, 15 та гол урган бўлса, «Барселона»да 207 баҳсда майдонга тушиб, ўз ҳисобига 73 та гол ёздириб қўяди.