Yanvar xaridlari: qishki transferlar oynasida amalga oshirilgan eng qimmat transferlar

Yevropa kuchli beshlik chempionatlarida qishki transferlar oynasi rasman yopildi. Ushbu oynadagi eng shov-shuvli transfer deb Mesut O‘zilning “Arsenal”dan “Fenerbahche”ga o‘tganini aytish mumkin. Odatda klublar qishda, mavsum o‘rtasida unchalik katta xaridlarni amalga oshirishni ma’qul ko‘rmaydi, ushbu yilda bunga qaysidir ma’noda koronavirus pandemiyasi ham “hissa” qo‘shib yubordi. Ammo har doim ham shunday bo‘lmagan. Tarixda shunday holatlar ham bo‘lganki, jamoalar mavsum o‘rtalarida yangi futbolchilarni xarid qilish uchun katta miqdordagi mablag‘larni sarflagan. Ularning qanchalik muvaffaqiyatli chiqqanligi esa umuman boshqa masala. Demak, quyida futbol tarixida qishda amalga oshirilgan eng qimmat transferlar haqida mulohaza yuritiladi.

Aleks Teysheyra — “Shaxtyor D”dan “Szyansu Sunin”ga

Transfer narxi: 50 million yevro

Teysheyra 2010-yilda Braziliyaning “Vasko da Gama”sidan “Shaxtyor”ga 6 million yevro evaziga ko‘chib o‘tgandi. Donesk klubida braziliyalik vinger shu qadar yorqin o‘yinlar ko‘rsatdiki, hatto “Liverpul” ham unga qiziqish bildirib qolgandi. Shu qatorda unga boshqa Yevropa klublari ham e’tibor qaratdi, ammo uning o‘zi Xitoyga ketishni ma’qul ko‘rdi. 2016-yilning fevral oyida “Shaxtyor” Aleksni 50 million yevroga “Szyansu Sunin”ga transfer qildi. 2020-yilgi mavsumda vinger Xitoy Superligasida g‘olib chiqdi, biroq 2021-yilning 1-yanvaridan beri u erkin agent maqomida. Mish-mishlarga ko‘ra, futbolchi “Shaxtyor”ga qaytishi mumkin. Bundan tashqari “Aston Villa” va “Benfika” kabi jamoalar ham unga jiddiy qiziqish bildirgan.

Brunu Fernandesh — “Sporting”dan “Manchester Yunayted”ga

Transfer narxi: 55 million yevro

Hozirda “qizil iblis”larning yetakchisiga aylangan Brunu borasida “Manchester Yunayted” va “Sporting” uzoq muddat bir to‘xtamga kela olmagan. Tomonlarning narx masalasida bir to‘xtamga kelishida muammolar bo‘lgan, shu tariqa bitim transfer oynasi yopilishidan bir necha kun oldin imzolangan. Mankunianlar oxir-oqibat portugaliyalik uchun 55 million yevro to‘lashdi. Bu yanvar me’yorlari bilan hisoblansa, anchayin jiddiy narx, ammo inglizlarning sarflangan pulga achinmayotgani aniq. Boisi Fernandesh yangi jamoasiga qo‘shilganidan bir necha hafta o‘tar-o‘tmas uning tom ma’nodagi yetakchisiga aylandi. Garchi, unga Angliya futboli begona bo‘lsa-da, Brunu darhol Premyer Ligada o‘z o‘yinini topib olishga muvaffaq bo‘ldi. “Yunayted” juda yuqori darajali futbolchini qo‘lga kiritdi va bu bilan transfer bozoridagi so‘nggi yillardagi omadsizliklarini yuvib yubordi. Eng muhimi, Manchesterning qizil tomoni uni qadrlaydi.

Fernando Torres — “Liverpul”dan “Chelsi”ga

Transfer narxi: 58,5 million yevro

Torres 2011-yilning yanvarida “Liverpul”dan 58,5 million yevro evaziga “Chelsi” o‘tgan. Mersisaydliklar bilan hech qanday sovringa ega chiqmagan, Fernando “aristokratlar” safida Chempionlar Ligasi, Yevropa Ligasi va Angliya Kubogida zafar quchdi. Shunga qaramay, ispaniyalik hujumchining transferini “Chelsi” uchun muvaffaqiyatli bo‘lgan deb hisoblash mushkul. Boisi 3,5 mavsum davomida forvard Premyer Ligada atigi 20 ta gol urgan, xolos. 2014-yilning yanvar oyida “ko‘klar” Torresni “Milan”ga ijaraga berib yuboradi, bir yildan so‘ng esa italyan klubi futbolchining transfer huquqini atigi 1 million yevroga sotib oladi. Shundan so‘ng Fernando qadrdon klubi “Atletiko”ga qaytadi, keyinchalik esa faoliyatidagi so‘nggi klub — “Sagan Tosu”ga yo‘l oladi.

Diyego Kosta — “Chelsi”dan “Atletiko”ga

Transfer narxi: 60 million yevro

Torresdan farqli o‘laroq, Kostaning transferi “Chelsi” uchun ancha omadli bo‘lib chiqdi. 2014-yilning iyul oyida “ko‘klar” Diyegoni “Atletiko”dan 38 million yevroga sotib olib, 2018-yilda uni “Atletiko”ning o‘ziga 60 million yevro sotdi. Ammo shundan keyin hujumchi “Chelsi”da bo‘lgani kabi har mavsumda 20 tadan gol ura olmadi. O‘z vaqtida futbol olamida yaxshigina shov-shuv ko‘targan Diyego hozirda erkin agent maqomida. Kuchli beshlik ligalarida transfer oynasi yopilgani hisobga olib aytilsa, muxlislar futbolchini kamida yozgacha top-chempionatlarda ko‘rmaydi.

Transfer narxi: 60 million yevro

Oskarning sotib olinishi va uning boshqa jamoaga transfer qilinishini ham “Chelsi” uchun yaxshi bitim deb hisoblash mumkin. 2012-yilning iyul oyida “Vasko da Gama”dan 32 million yevroga sotib olingan Oskar 2017-yilning yanvarida 2 baravar qimmatroqqa (60 million yevro) “Shanxay”ga sotib yuboriladi. Umuman olganda, braziliyalik Londonda yaxshi harakat qildi, ammo u “aristokrat”larning yetakchisi emasdi. Shunday ekan Oskar bilan xayrlashish, ayniqsa, katta miqdordagi mablag‘ evaziga “Chelsi” uchun og‘riqli bo‘lmagan. Yaqinda yarim himoyachi faoliyatini London klubida yakunlash istagi borligi haqida gapirdi, ammo bu ehtimoldan ancha yiroq bo‘lib, “ko‘klar” odatda faxriy va yoshi katta futbolchilar(i)ni uncha xushlamaydi.

Pyer-Emerik Obameyang — “Borussiya D”dan “Arsenal”ga

Transfer narxi: 63,8 million yevro

2018-yil yanvar oyida Obameyang mojaro bilan Dortmund klubini tark etdi. “Arilar” muhim o‘yinchisidan ajraladi, ammo buning evaziga ular yaxshigina tovon pulini qo‘lga kiritgandi. Gabonlik ham o‘z navbatida boshqa klubga o‘tib, 2 ta sovrin qo‘lga kiritdi — Angliya Kubogi va Superkubogi. Obameyangning transferidan “kanonirlar”ning adashmagani aniq. Ortda qolgan ikki mavsumda hujumchi APLda 22 tadan gol urdi. Buning ustiga tartib masalasida ham Obameyangda Londonda hammasi joyida. Axir “Arsenal”ning sardori bo‘lishgacha borishning o‘zi bo‘ladimi? Shu tariqa 2020-yilda futbolchi “kanonirlar” bilan shartnomasini uzaytirdi, Mikel Arteta esa o‘yinni uning atrofida qurmoqda.

Transfer narxi: 64 million yevro

Pulishichning transferi “Borussiya” uchun faqatgina omadli bo‘lgan. Dortmund klubi 2015-yilda yosh vingerni tekinga qo‘lga kiritib, 4 yildan so‘ng uni “Chelsi”ga 64 million yevroga sotadi. Bugungi kunda Kristian eng istiqbolli amerikalik futbolchilardan biri hisoblanadi. 22 yoshida u AQSh terma jamoasi safida 34 uchrashuv o‘tkazishga va 14 gol urishga ulgurgan. Biroq Londonda u hali ham to‘laligicha ochila olmayapti. Pulishich ba’zida juda yaxshi o‘yin ko‘rsatsa, boshqa vaziyatlarda juda yomon o‘yin ko‘rsatadi. Bundan tashqari futbolchini muntazam ravishda jarohatlar qiynab keladi. Shunga qaramay “ko‘klar” hamon futbolchiga ishonishda va unga katta umid bog‘lashda davom etmoqda.

Transfer narxi: 65 million yevro

Fransiyalik futbolchi o‘z vatanida professional faoliyat olib bormagan. O‘z professional yo‘lini “Atletik”da boshlagan Lyaport 2018-yilning yanvarida 65 million yevroga “Manchester Siti”ga o‘tadi. O‘shanda “shaharliklar”ning himoyachi uchun buncha ko‘p pul sarflagani ko‘pchilikni hayratga solgandi. Biroq “Siti”ning hamon himoyachi sotib olayotgani hisobga olinsa, buning hech ajablanarli yeri yo‘q. Kutilgan o‘yinni namoyish eta olmagan Lyaport 2019/20-yilgi mavsumda tizzasidagi jarohatlari tufayli ko‘plab uchrashuvlarni o‘tkazib yubordi. 2020/21-yilgi mavsumda ham fransuz deyarli o‘ynayotgani yo‘q. Chunki Xosep Gvardiola himoya markazida boshqa ijrochilarni qo‘llashni afzal ko‘rmoqda. Himoyachining “Manchester Siti” bilan shartnomasi esa hali yana 4,5 yil amalda bo‘ladi.

Virjil van Deyk — “Sauthempton”dan “Liverpul”ga

Transfer narxi: 84,7 million yevro

“Liverpul” odatda futbolchilar uchun katta mablag‘lar sarflamaydi, ammo van Deyk ushbu an’anadan mustasno. Niderlandiyalik “qizillar”ga sovrin qo‘lga kiritish uchun yetishmayotgan futbolchilardan biri edi. Aynan uning kelishi bilan mersisaydliklarning himoyasi yanada ishonchli tus oldi. Virjil darhol “Liverpul”ning asosiy tarkib futbolchisiga va yetakchisiga aylandi. Futbolchining moslashishiga deyarli vaqt talab qilinmadi, chunki u bunga qadar Premyer Ligada 2,5 mavsum o‘tkazishga ulgurgandi. 2020/21-yilgi mavsumda esa Virjilning yo‘qligi jamoaga katta ta’sir o‘tkazmoqda. Himoyachi ayni paytda mavsum avvalida olgan jiddiy jarohatidan tiklanish bilan ovora. Mavsum oxirlariga borib uning maydonga qaytishiga umid qilinmoqda.

Transfer narxi: 145 million yevro

“Liverpul” transfer bozorida har tomonlama yaxshi harakat qiladi. Bunga yaqqol misol qilib mersisaydliklarning qishda 100 million yevrodan qimmatroqqa futbolchi sotgan yagona klub ekanligini keltirish mumkin. Biroq “Barselona” uchun ushbu transferni muvaffaqiyatli deb atab bo‘lmaydi. Birinchidan, kataloniyaliklar hali ham Koutinyo uchun “Liverpul”dan qarzdor. Ikkinchidan, ular hamon braziliyalikdan qanday foydalanishni bilmaydi. Buning ustiga futbolchining o‘zini ham omadli deb atash mushkul. Yarim himoyachi bilan ishlashni chin dildan istagan yagona murabbiy (Kike Setyen) “ko‘k-anorranglilar” boshqaruvida bir necha oy ishladi, xolos. Ushbu transferning qanchalik foydali bo‘lganidan qat’i nazar, bu “Barselona” tarixidagi eng qimmat xarid bo‘lib qolaveradi.