Rossiyaning Nyu-Yorkdagi bosh konsulxonasi AQSh davlat departamentidan diplomatik missiyaning xavfsizligini ta’minlashni so‘radi. 2-fevral kuni bino yonida norozilik aksiyalari bo‘lib o‘tdi, diplomatik missiya binosiga qizil bo‘yoq sepishdi. Bu haqda “RIA Novosti” xabar bermoqda.
“14:00 dan 20:00 gacha bosh konsulxona binosi yonida Rossiyaga qarshi miting bo‘lib o‘tdi, niqob kiyib olgan noma’lum shaxs bir necha marta bo‘yoq otdi. Binomizning old tomoni, bir qismi qizil bo‘yoqqa bo‘yaldi”, — deya ma’lum qildi elchixona xodimi. Uning so‘zlariga ko‘ra, aksiya ishtirokchilari soni taxminan o‘n kishini tashkil qilgan, ular nimani talab qilgani yoki qanday shiorlarni aytganiga aniqlik kiritilmadi.
Bosh konsulxona da’vo qilishicha, huquq-tartibot organlari iltimoslarga qaramay, bino yonida tartibni ta’minlamagan. “Ikkidan sakkizgacha ular konsulxona yoniga kelishni imkonsiz deb bildi. Biz tomonimizdan davlat departamentining Nyu-Yorkdagi xorijiy vakolatxonalar boshqarmasiga bosh konsulxona xavfsizligini ta’minlash haqidagi iltimos bilan murojaat yuborildi”, — dedi diplomatik missiya vakili.
Eslatib o‘tamiz, 19-yanvar kuni Rossiyaning Nyu-Yorkdagi bosh konsulxonasidagi barcha telefon liniyalari uzilib qolgani, shu bilan birga, internet va uyali aloqa bilan bog‘liq muammolar bo‘lgani xabar berilgan edi.
Rossiyaning Nyu-Yorkdagi bosh konsulxonasi 1994-yilda ochilgan. U Manxetten markazida 91-ko‘chada joylashgan bo‘lib, Konnektikut, Illinoys, Indiana, Men, Massachusets, Michigan, Minnesota, Nyu-Xempshir, Nyu-Jersi, Nyu-York, Ogayo, Pensilvaniya, Rod-Aylend, Vermont va Viskonsin shtatlarida yashaydigan Rossiya fuqarolariga konsullik xizmatlarini taqdim etadi.
Izoh (0)