Toshkent viloyatida IIB ro‘yxatida turuvchi yuzlab yoshlar harbiy poligonga olib ketilgani haqida xabarlar tarqaldi. “Kun.uz”ning yozishicha, ota-onalarning ayrimlari farzandlari qayerga olib ketilganidan bexabar qolgan. Viloyat IIBB matbuot xizmati holat yuzasidan rasmiy izoh berdi.

Foto: Toshkent viloyati IIBB matbuot xizmati

Ma’lum qilinishicha, Prezident huzuridagi Xavfsizlik kengashining 2021-yil 12-yanvar kuni o‘tkazilgan yig‘ilishida Shavkat Mirziyoyev tomonidan “Uyushmagan yoshlarni harbiy-vatanparvarlik ruhida tarbiyalash, ularda Vatanga muhabbat hissini singdirish hamda ularni mehnat bozorida talab yuqori bo‘lgan kasb-hunarlarga o‘rgatish” bo‘yicha bergan topshiriqlarining ijrosini ta’minlash maqsadida chora-tadbirlar ishlab chiqilgan.

Jumladan, qabul qilingan qarorga asosan Toshkent viloyatining shahar-tuman IIOda profilaktik hisobda turgan, ilgari jinoyat sodir etib, tuzalish yo‘liga kirmagan, foydali mehnat turi bilan shug‘ullanmasdan yurgan 200 nafar yoshlar bilan ishlab chiqilgan 10 kunlik o‘quv dasturi bo‘yicha o‘qitish belgilangan va ular 2021-yilning 27-yanvar Chirchiq shahridagi harbiy okrugga qarashli dala o‘quv poligoniga olib borilgan.

Dastur bo‘yicha ularga ma’naviy-ma’rifiy tayyorgarlik, harbiy huquq, O‘zbekiston tarixi, harbiy tayyorgarlik kabi yo‘nalishlar bo‘yicha mashg‘ulotlar o‘tkazilishi rejalashtirilgan. Shuningdek, ularning mehnat bozoriga kerakli kasb bo‘yicha mutaxassis tayyorlash yo‘nalishlari bo‘yicha ham qiziqishlariga qarab darslar beriladi.

Shu bilan birga, 27-yanvar kuni davlat rahbari boshchiligida bo‘lib o‘tgan yoshlar siyosatiga bag‘ishlangan videoselektor yig‘ilishida ham bir qator ustuvor vazifalar ichki ishlar organlari va prokuratura zimmasiga yuklatildi. Xususan, IIO hisobida turgan yoshlar bilan alohida ishlarni tashkil qilish, ularni vatanparvarlik ruhida tarbiyalash, qiziqishlari bo‘yicha kasbga yo‘naltirish, bandligini ta’minlash va boshqa vazifalar.

Shuningdek, Bosh boshqarma axborot xizmati boshlig‘i Bobur To‘laganov harbiy poligonga olib kelingan yoshlar 10 kunlik dastur asosida ma’naviy-ma’rifiy darslar, huquq soatlari, harbiy va kasbiy tayyorgarlik mashqlarida qatnashishini, ular 3 mahal issiq ovqat va turar joy bilan ta’minlanishini ma’lum qilgan.

Uning aytishicha, mashg‘ulotlardan so‘ng ularga mehnat birjasi orqali munosib ish topib berish maqsad qilingan. Ushbu mashg‘ulotlar ixtiyoriy bo‘lib, harbiy poligonga olib kelinganlarning deyarli barchasi bu yerdagi holatdan roziligini, muqaddam sudlangan yigitlarning ayrimlari hali ham tuzalish yo‘liga o‘tmagani, yomon xulqidan shikoyat qilingani uchun ota-onasining iltimosi bilan keltirilgan.