Avval xabar berilganidek, Shavkat Mirziyoyev Buxoro viloyatiga amalga oshirgan rasmiy tashrifi davomida Buxoro shahridagi davlat xizmatlari markazi va IT Park’ga tashrif buyurdi.
“Daryo” muxbiri davlat rahbarining ushbu hududga tashrifi va u yerdagi ish jarayonlaridan tayyorlangan fotolavhalarni taqdim etdi.
Davlat xizmatlari markazi
Buxoro shahar, Bahouddin Naqshband ko‘chasida joylashgan axborot-resurs markazining 3528 kvadrat metrdan iborat 2 qavatli binosi Davlat xizmatlari agentligi Buxoro viloyat boshqarmasiga berilgan. Mazkur bino 15 milliard so‘m mahalliy budjet mablag‘lari hisobidan rekonstruksiya qilingan.
Bugungi kunda mazkur markazda 130 dan ortiq turdagi davlat xizmatlari ko‘rsatilmoqda. Binoda 46 ta xona bo‘lib, aholi va tadbirkorlarga xizmat ko‘rsatuvchi bank filiali, investorlar xonasi va boshqa qo‘shimcha xonalar mavjud. Bu yerda Davlat xizmatlari agentligi viloyat boshqarmasi, Buxoro shahar davlat xizmatlari markazi, Tadbirkorlar murojaatlarini ko‘rib chiqish bo‘yicha viloyat va shahar qabulxonalari, Buxoro shahar Xalq qabulxonasi, Buxoro shahar 1-son FHDYo bo‘limi, Buxoro shahar 2-son notarial idorasi hamda davlat xizmatlarini ko‘rsatuvchi davlat organlari hamda boshqa tashkilotlar vakillari faoliyat yuritadi.
Davlat xizmatlaridan foydalanuvchilarga elektron navbat asosida xizmat ko‘rsatiladi. Binoga tashrif buyuruvchilar uchun qo‘shimcha qulayliklar yaratish maqsadida bino, kutish zali, lift va eskalator bilan ta’minlangan. Kutuvchilarni bo‘sh vaqtidan unumli foydalanish maqsadida kutish zalida kitoblar javoni tashkil etilgan. Markazda 67 nafar xodim faoliyat olib boradi.
IT-Park majmuasi
Bu yerda ham o‘quvchilar, ham talabalar, ham frilanser va dasturchilar uchun zarur sharoitlar yaratilgan. Bolalar maktab davridan o‘yinlar orqali axborot texnologiyalariga qiziqtiriladi, keyin o‘qitilib, loyihalar ishlab chiqishga o‘rgatiladi. Bu yerda yosh havaskorlar, robototexniklar, veb-dizaynerlar, professional dasturchilar yig‘ilgan.
IT-Park majmuasi bugungi kunda vaqtinchalik binoda, ya’ni Davlat xizmatlari markazining ikkinchi qavatida faoliyat olib bormoqda. 2022-yilda IT-Park uchun alohida bino foydalanishga topshirilishi ko‘zda tutilmoqda.
Buxoro shahri, Bukhara City zamonaviy ishbilarmonlik va turar joylar markazida “77-LOT” doirasida 2 ta blokdan iborat IT-Park kompleksini barpo etish ishlari buyurtmachi va investor “Buxoro Agroklaster” mas’uliyati cheklangan jamiyatga tegishli. Loyihachi Vertebra Omurga Mimarlık İnşaat Restorasyon Ve Planlama San. Ve Tic.Ltd.Şti. nomli Turkiya kompaniyasi sanaladi. Loyiha qiymati qariyb 13,1 million yevroni tashkil etadi. Yangi IT-Park kompleksi umumiy maydoni 14,4 ming metr kvadrat, binolari 9 va 12 qavatli bo‘lib, mehmonxona, restoran, kovorking markazi, ofislar, dam olish xonasi va sport zallarini o‘z ichiga oladi.
IT-Park quyidagi yo‘nalishlarga ixtisoslashadi:
- inkubatsiya va akseleratsiya dasturlari;
- davlat va xususiy venchur jamg‘armalari;
- xalqaro standartlardagi IT-akademiya;
- zamonaviy jihozli, qulay ish o‘rinlari va IT-muhit;
- yuridik, buxgalteriya va marketing sohalarida ko‘mak.
Bugungi kunda obyektda yer qazish (kotlovan) va tuproqni mustahkamlash hamda svay o‘rnatish ishlari olib borilmoqda.
Shavkat Mirziyoyevning Buxoroga tashrifiga oid boshqa xabarlar:
- Shavkat Mirziyoyev Buxoroga tashrifini shamoldan zarar ko‘rgan Olot tumanidan boshladi
- “Xalq dardini rahbarlarga lo‘nda qilib qo‘ysa, mahalla raisi obro‘li bo‘ladi”. Shavkat Mirziyoyev Buxoroda to‘rtta tuman faollari bilan uchrashdi
- Olot–Toshkent temiryo‘l qatnovi qayta tiklanadi hamda Olot va Qorako‘l tumanlarida ichimlik suvi ta’minoti 90 foizga yetkaziladi
- Shavkat Mirziyoyev Buxoro Varnet agrosanoat majmuasiga tashrif buyurdi
- Shavkat Mirziyoyev Bukhara Cotton Textile korxonasi faoliyati bilan tanishdi
Izoh (0)