Ijtimoiy tarmoqlarda koronavirusning yangi shtammi O‘zbekistonda ham aniqlangani, bu kasallik oldingisidan-da og‘ir kechishi to‘g‘risidagi audio tarqaldi. Shuningdek, Toshkent davlat pedagogika universitetida ham virusning yangi shtammi qayd etilgani aytiladi. “Gap bundoq, fevral oyidan boshlab karantin qaytarkan. Kovid markazlar yana ochilarkan. Yangi shtammda burun bitib, tomoq yiringlashi, ich ketishi bilan kecharkan. Kasallik juda keskin kecharkan. Kimda kuzatilsa, darhol shifokorga murojaat qilsin”, — deydi kimligi noma’lum bo‘lgan erkak.
Koronavirusga qarshi kurashish shtabi a’zosi Nurmat Otabekov bu mish-mishlar o‘rinsiz ekanligini “Kun.uz”ga ma’lum qildi.
“O‘zbekistonda koronavirusning yangi shtammi qayd qilinmagan. Yuqoridagi audioda aytilgan belgilar oldingi shtammga ham xos bo‘lishi mumkin. Yangi shtamm qayd qilinmagani tufayli ehtiyot choralarini susaytirish yaramaydi. Biz hamon pandemiya davrida yashayapmiz.
Karantin choralarining fevral oyida kuchaytirilishi haqidagi gaplar o‘rinsiz. Bu borada faqat Respublika maxsus komissiyasi qaror chiqarishi mumkin. Bunday qaror chiqarilganda esa rasman e’lon qilinadi”, — degan Nurmat Otabekov.
Uning aytishicha, O‘zbekistonda har kuni turli hududlarda koronavirus aniqlanmoqda. Shu jumladan, Toshkent davlat pedagogika universitetining talabasida ham koronavirus infeksiyasi qayd etilgani rost. Ammo bu yangi shtamm emas, umuman epidemiologik vaziyat ham barqaror. O‘sha fakultet talabalariga ma’lum muddat javob berilgani esa standart amaliyot.
“Takror aytaman, kasallik bizga kirib kelmabdi, deya xotirjamlikka berilish, himoya va gigiyena qoidalarini unutish to‘g‘ri emas. Ehtiyot choralari hamon amalda”, — degan Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov.
25-dekabrda ham O‘zbekistonda karantin choralari kuchaytirilishi haqidagi gaplar tarqalgan, Nurmat Otabekov bunga munosabat bildirib, bugun bu kabi cheklovlar haqida o‘ylash uchun umuman asos yo‘qligi, mamlakatda koronavirus kasalligi bo‘yicha barqaror epidemik vaziyat hukm surayotgani sababli Respublika maxsus komissiyasi a’zolari karantin tadbirlarini kuchaytirish haqida hozircha o‘ylab ko‘rmaganini ma’lum qilgandi.
“Xalqimizda niyatga yarasha beradi, degan gap bor. Bilmadim, ba’zi shaxslar bu kabi mish-mishlarni yaxshi niyatda tarqatishyaptimi yoki doim shunday ‘sovuq’ niyat qilishga o‘rganib qolishganmi... Xalqni besaranjom qilib, chalg‘itib, qo‘rqitib yoki xavotirga solib baraka topmaysiz”, — degan edi u.
Shuningdek, O‘zbekistonda ham koronavirusga qarshi jamoaviy immunitet hosil bo‘lgani, “agar aholining 70 foizida immunitetni shakllantira olsak (emlash orqali yoki kasallanish oqibatida), demak, biz pandemiyani jilovlay olamiz, aniqroq aytsak, biz uni yengamiz”, deb aytgandi.
Izoh (0)