“Derazalar yaxshi yopilyaptimi, shamol kirmayaptimi, eshiklar yopiladimi?”. Energetika vaziri yanvar oyi oxirida kutilayotgan sovuq ob-havoga tayyorgarlik ishlari haqida

O‘zbekistonga yanvar oyi oxirida kutilayotgan anomal sovuqdan o‘tib olish uchun energiya tizimida barcha imkoniyat mavjud. Bu haqda 19-yanvar kuni AOKAda bo‘lib o‘tgan brifingda energetika vaziri Alisher Sultonov aytib o‘tdi, deya xabar bermoqda “Daryo” muxbiri.

Anjumanda Alisher Sultonov “Sovuq kunlarda aholini gaz, elektr energiyasi va ko‘mir bilan ta’minlashda kuzatilayotgan muammolar” mavzusida bo‘lib o‘tgan brifingda energiya resurslarini tejamkorlik bilan ishlatishni tavsiya qildi.

Avvallari ham qishga tayyorgarlik ko‘rganimizda uyimizni, ish joyimizni, bog‘cha va maktablarni isitishni o‘ylardik. Derazalar yaxshi yopilyaptimi, shamol kirmayaptimi, eshiklar yopiladimi, eshiklarni isitishni ham o‘ylardik. Bugungi kunda juda ham ko‘p vaziyatlar kuzatilyapti, nostandart moslamalar ishlatilganda ko‘p energiyamiz ko‘chani isitishga ketyapti. Bunday holatda ishlab chiqarishni ko‘paytirsak ham hech qachon gazni ham, elektrni ham yetkazib berolmaymiz. Shuning uchun, hurmatli iste’molchilar, shu yo‘nalishda birgalikda ishlashni men sizlardan iltimos qilardim.

Alisher Sultonov, energetika vaziri

Vaziring ta’kidlashicha, yanvar oyi oxirida kutilayotgan anomal sovuq havodan o‘tib olish uchun energiya tizimida barcha imkoniyatlar mavjud.

“Ushbu haftaning oxiriga kelib, O‘zbekistonda sovuq ob-havoning yangi to‘lqini noldan past haroratgacha tushishi kutilmoqda. Biz vaziyatdan yaxshi xabardormiz, muammolarni yengillashtirish, uy-joylar va ish joylarining barqaror energiya va gaz bilan ta’minlashga erishish uchun barcha chora-tadbirlarni amalga oshiryapmiz”, – dedi u.

“Hududiy elektr tarmoqlari» AJ boshqaruvi raisining birinchi o‘rinbosari Jahongir Obidjonovning ma’lum qilishicha, 2021-yilning 18 kunida Respublika bo‘yicha iste’molchilarga 3,0 mlrd kVt soat, shundan aholiga 1,1 mlrd kVt soat va ulgurji iste’molchilarga 1,9 mlrd kVt soat miqdorida elektr energiyasi yetkazib berildi.

“Tarmoqlarda sodir bo‘ladigan avariyaviy o‘chishlarni tezkor bartaraf etish maqsadida hududlarda jami 481 ta tezkor avariyaviy chiqish brigadalari tuzildi, ularga 378 ta maxsus avariyaviy chiqish mashinalari va maxsus texnikalar ajratildi. Hududiy korxonalarda 395 dona tarmoq transformatorlar, 191,8 tonna transformator moyi, 947 dona tayanchlar, 53,9 tonna turli o‘lchamdagi sim, 41,5 kilometr kabel mahsulotlari hamda 638 dona kabel muftalaridan iborat zaxira yaratildi”, – dedi Jahongir Obidjonov.

Uning qo‘shimcha qilishicha, 2021-yilda iste’molchilarga 56,3 mlrd kVt soat elektr energiyasini yetkazib berish (o‘sish sur’ati 104,1%), shundan aholiga 15,7 mlrd kVt soat, iqtisodiyot tarmoqlariga 40,6 mlrd kVt soat elektr energiyasi yetkazib berish rejalashtirilgan.