Xitoyda 5 mln aholi yashaydigan shahar bir kishida koronavirus aniqlangani sabab izolyatsiyaga olindi

Pekin janubida joylashgan Xebey provinsiyasining Lanfan shahri aholisi koronavirusning yangi to‘lqinining oldini olish uchun uy sharoitida yetti kunlik o‘zini o‘zi yakkalash tartibga o‘tdi. Shaharda 5 million aholi istiqomat qiladi, deb yozadi “RBK”.

12-yanvar kuni mahalliy hukumat tomonidan bepul PZR-testdan o‘tkazish boshlangan bo‘lib, u 14-yanvarga qadar davom etadi. Bundan tashqari, transport vositalari harakati ham cheklangan. Shaharni faqatgina favqulodda holatlarda tark etish mumkin.

Xitoy Sog‘liqni saqlash milliy komissiyasi ma’lumotlariga ko‘ra, Xebey provinsiyasida jami 40 kishida koronavirus aniqlangan, Lanfan shahrida — bir kishida. Virus aniqlangan ayol 31-dekabr kuni o‘tgan hafta koronavirus bilan kasallanish holati kuzatilgan Shiszyachjuan shahrida bo‘lgan.

Avvalroq koronavirusning yangi shtammi Xitoygacha yetib borgani to‘g‘risida xabar berilgandi.

Eslatib o‘tamiz, Buyuk Britaniyada sentabr oyida koronavirusning yangi, yuqumliroq B.1.1.7 shtammi aniqlandi. Dekabr o‘rtalariga kelib, Londondagi kasallanish holatlarining uchdan ikki qismi virusning shu varianti bilan bog‘liq bo‘lib qoldi. 20-dekabrdan Britaniya hukumati yangi shtamm tufayli koronavirusga qarshi cheklovlarni kuchaytirdi.

Hozirgacha yangi shtamm Buyuk Britaniyadan tashqari Niderlandiya, Avstraliya, Daniya, Braziliya, Germaniya, Shveysariya, Fransiya, Yaponiya,  Janubiy Koreya,  Iordaniyada, BAA hamda AQShda aniqlandi.