Rossiyada yashash va ishlash istagidagi chet elliklar uchun rus tili, Rossiya tarixi va qonunchiligi bo‘yicha imtihon topshirishning yangi qoidalari o‘rnatiladi. Imtihonlarning murakkablik darajasi esa chet el fuqarosining mamlakatda bo‘lish maqsadiga bog‘liq bo‘ladi, deb xabar beradi O‘zbekiston Tashqi mehnat migratsiyasi agentligi.
Ta’kidlanishicha, ushbu tartib Duma tomonidan qabul qilingan hukumat qonunida belgilangan.
Hozirgi vaqtda Rossiyaning hududiy boshqaruvi ushbu imtihonni o‘tkazuvchi ta’lim muassasalari ro‘yxatini hamda imtihonni o‘tkazish tartibi va shaklini belgilash huquqiga ega. Yangi qonunga muvofiq, imtihonlar rasmiy ro‘yxatga kiritilgan ta’lim muassasalari tomonidan o‘tkazilib, tegishli sertifikat beriladi.
Shu bilan birga, sertifikatning amal qilish muddati uni olish maqsadiga bog‘liq bo‘ladi. Masalan, vaqtinchalik yashash yoki ishlash uchun ruxsatnoma olish istagidagi chet el fuqarolariga sertifikat uch yil muddatga beriladi.
Qonun rasmiy e’lon qilingan kundan 180 kun o‘tgach kuchga kiradi.
Eslatib o‘tamiz, Rossiya prezidenti Vladimir Putin mehnat shartnomasi bo‘yicha mamlakatga kelayotgan muhojirlardan rus tilidan imtihon topshirishni taqozo etadigan qonunni imzolagan edi. Bundan faqat 1991-yilning 1-sentabriga qadar bo‘lgan davr mobaynida oliy ta’lim olgan yuksak malakali mutaxassislar va xorij fuqarolari mustasno. Boshqa migrantlardan esa Rossiya hududida yashash huquqi, patent olish, vaqtincha ro‘yxatdan o‘tish, ishlash huquqini olish uchun rus tili, Rossiya tarixi va qonunchiligi bo‘yicha imtihon topshirish talab etillardi.
Izoh (0)