Prezident “2021–2023-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi qarorni imzoladi.
Adliya vazirligi matbuot xizmati xabariga ko‘ra, qaror bilan 2021-yilda ijtimoiy va ishlab chiqarish infratuzilmasini rivojlantirishning asosiy parametrlari va 2022—2023-yillar uchun maqsadli mo‘ljallar tasdiqlandi.
Unga ko‘ra, belgilangan yillarda respublikada jumladan:
- 22 ta bog‘cha (jami 2 970 o‘ringa ega), 31 ta umumta’lim va ixtisoslashtirilgan maktablar (jami 13 934 o‘quv o‘rniga ega), 16 ta OTM (jami 9 300 o‘quv o‘rniga ega) yangi quriladi;
- jismoniy tarbiya va sport obyektlarini qurish, rekonstruksiya qilish, mukammal ta’mirlash bo‘yicha jami 55 ta loyiha (shundan 23 tasi yangi qurilish) amalga oshiriladi;
- 11 ta madaniyat va san’at obyektlari yangidan qurilib, 7 tasi rekonstruksiya qilinadi;
- sog‘liqni saqlash obyektlarini qurish, rekonstruksiya qilish, mukammal ta’mirlash va jihozlash bo‘yicha jami 131 ta loyiha (shundan 24 tasi yangi qurilish) amalga oshiriladi.
Bundan tashqari, temiryo‘l va metropoliten yo‘lini rivojlantirish choralari ham ko‘riladi.
Eslatib o‘tamiz, Prezident Shavkat Mirziyoyev 29-dekabr kuni Oliy Majlisga yo‘llagan murojaatnomasida bog‘chalar bilan qamrab olishni 2023-yil oxirigacha 75 foizga yetkazish kerakligini aytgandi. Shuningdek, 2021-yilda 30 ta yangi maktab qurilishi, bolaga ortiqcha yuklama bermaydigan “Milliy o‘quv dasturi” joriy etilishini ma’lum qilgan. Milliy o‘quv dasturini ishlab chiqishga finlyandiyalik mutaxassislar jalb etiladi.
Oliy va o‘rta maxsus ta’lim vaziri o‘rinbosari Uzoqboy Begimqulov O‘zbekistonda 2021-yil 1-sentabrga qadar har bir hududda kamida bittadan nodavlat oliy ta’lim tashkiloti ochilishini bildirgan.
Izoh (0)