Президент «2021–2023 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида»ги қарорни имзолади.
Адлия вазирлиги матбуот хизмати хабарига кўра, қарор билан 2021 йилда ижтимоий ва ишлаб чиқариш инфратузилмасини ривожлантиришнинг асосий параметрлари ва 2022—2023 йиллар учун мақсадли мўлжаллар тасдиқланди.
Унга кўра, белгиланган йилларда республикада жумладан:
- 22 та боғча (жами 2 970 ўринга эга), 31 та умумтаълим ва ихтисослаштирилган мактаблар (жами 13 934 ўқув ўрнига эга), 16 та ОТМ (жами 9 300 ўқув ўрнига эга) янги қурилади;
- жисмоний тарбия ва спорт объектларини қуриш, реконструкция қилиш, мукаммал таъмирлаш бўйича жами 55 та лойиҳа (шундан 23 таси янги қурилиш) амалга оширилади;
- 11 та маданият ва санъат объектлари янгидан қурилиб, 7 таси реконструкция қилинади;
- соғлиқни сақлаш объектларини қуриш, реконструкция қилиш, мукаммал таъмирлаш ва жиҳозлаш бўйича жами 131 та лойиҳа (шундан 24 таси янги қурилиш) амалга оширилади.
Бундан ташқари, темир йўл ва метрополитен йўлини ривожлантириш чоралари ҳам кўрилади.
Эслатиб ўтамиз, Президент Шавкат Мирзиёев 29 декабрь куни Олий Мажлисга йўллаган мурожаатномасида боғчалар билан қамраб олишни 2023 йил охиригача 75 фоизга етказиш кераклигини айтганди. Шунингдек, 2021 йилда 30 та янги мактаб қурилиши, болага ортиқча юклама бермайдиган «Миллий ўқув дастури» жорий этилишини маълум қилган. Миллий ўқув дастурини ишлаб чиқишга финляндиялик мутахассислар жалб этилади.
Олий ва ўрта махсус таълим вазири ўринбосари Узоқбой Бегимқулов Ўзбекистонда 2021 йил 1 сентябрга қадар ҳар бир ҳудудда камида биттадан нодавлат олий таълим ташкилоти очилишини билдирган.
Изоҳ (0)