Koronavirusning birinchi marta Buyuk Britaniyada aniqlangan yangi shtammi Iordaniya va Janubiy Koreyada ham qayd etildi, deb yozadi “RBK”. Ushbu mamlakatlar hukumatlari ilk kasallanganlar aniqlangani haqida xabar berdi, ularning barchasi avvalroq Britaniyada bo‘lib qaytgan.
Koreya kasalliklar nazorati va profilaktikasi boshqarmasi ma’lum qilishicha, virusning yangi turi uch kishida tasdiqlangan, ularning barchasi bir oila a’zolari. Kasallanganlar Buyuk Britaniyadan o‘tgan hafta qaytib kelgan.
Koreyalik shifokorlar yaqinda Britaniyadan qaytgan yana bir oilani ham yangi shtammga tekshiradi. Uning a’zolaridan biri, keksa erkak avvalroq vafot etgan edi, o‘limdan keyingi tahlil unda COVID-19 bo‘lganini ko‘rsatgan, ammo shtammning aniq turi hozircha belgilanmagan.
Iordaniya sog‘liqni saqlash vaziri Nazir Obeydat ma’lum qilishicha, mamlakatda ikki kishi koronavirusning yangi shtammiga chalingan, bular 19-dekabr kuni Britaniyadan qaytib kelgan er-xotindir. Vazirning so‘zlariga ko‘ra, ularning salomatligi joyida, er-xotin uy karantiniga yuborilgan. Iordaniya hukumati ularning muloqot doirasini aniqlashtirmoqda.
Buyuk Britaniyada koronavirusning yangi turi aniqlangani, shu tufayli mamlakatning ayrim hududlarida kasallik tarqalish sur’ati tezlashgani haqida 14-dekabr kuni mahalliy Sog‘liqni saqlash vazirligi rahbari Mettyu Xenkok ma’lum qildi. Buyuk Britaniya bosh vaziri Boris Jonsonning so‘zlariga ko‘ra, ushbu turdagi koronavirus avvalgilaridan 70 foizga yuqumliroq, lekin undan xavfli emas.
Jahon sog‘liqni saqlash tashkiloti 20-dekabr kuni Britaniyanikiga o‘xshash koronavirus Niderlandiya, Daniya va Avstraliyada ham aniqlanganini e’lon qildi. Hozirda tashkilot bu shtammni o‘rganmoqda.
Avvalroq Janubiy Afrika Respublikasi (JAR)da ham shunga o‘xshash mutatsiyadagi virus topilgani haqida xabar berilgan edi.
Keyinroq Daniya va Braziliyada koronavirusning yangi mutatsiyalari aniqlandi. Britaniyaning o‘zida ham koronavirusning yana bir yangi shtammi aniqlandi. Shu bilan birga, Germaniya va Shveysariyada koronavirusning “britancha” shtammi, Nigeriyada esa butunlay yangi mutatsiyasi qayd etildi.
26-dekabr kuni koronavirusning “britancha” shtammi Fransiya va Yaponiyada ham aniqlandi.
Izoh (0)