Yangi yil arafasida bayram shukuhini ulashadigan eng yaxshi va mashhur qo‘shiqlarni tavsiya qilamiz.
ABBA guruhi “Happy New Year”
Yangi yil bayramini afsonaviy shved guruhi ABBA’ning “New year” nomli qo‘shig‘isiz tasavvur qilib bo‘lmaydi. Bayram shukuhini baxsh etadigan qo‘shiq ilk bor 1980-yilda ijro qilingan bo‘lib, bir zumda muxlislar qalbidan joy olishga muvaffaq bo‘lgan. Shundan keyin boshqa ijodkorlar ham o‘z talqiniga ko‘ra kuylagan. Har bir ijroda alohida o‘ziga xoslik mujassam ekaniga qaramay, aynan 1980-yildagi versiya eng mashhuri hisoblanadi.
Wham! “Last Christmas”
“Last Christmas” qishki bayramga mos va xos bo‘lgan yana bir klassik qo‘shiq hisoblanadi. Boshqa xonandalar tomonidan bir necha marta qayta kuylanganiga qaramay, mualliflari Jorj Maykl va Endryu Rijli tomonidan kuylangani hali hamon xit sanaladi.
Judi Garlend “Have yourself a merry little Christmas”
Judi Garlendning 1944-yilda taqdim qilgan “Have yourself a merry little Christmas” qo‘shig‘i Yangi yil kayfiyatining ramziga aylangan. “Sent Luisda meni kutib ol” filmi uchun kuylangan kompozitsiya ko‘p o‘tmay mashhurlikka erishgan va afsonaviy ijodkorlar Uitni Xyuston, Bob Dilan va Frenk Sinatra tomonidan ham qayta kuylangan.
Maria Karrey “All I want for Christmas is you”
Yangi yil bazm va ziyofatlarini ushbu qo‘shiqsiz tasavvur qilib bo‘lmaydi. Bayramona kayfiyat baxsh etadi, mehmon va ishtirokchilar birga qo‘shilib xirgoyi qiladigan qo‘shiq uchun xonanda yaqindagini yangi qishki mo‘jizalarni o‘zida mujassam etgan klip ishladi.
Bobby Helms “Jingle bell rock”
Bayramga xos bo‘lgan eng mashhur qo‘shiqlardan biri 1957-yildagi Rojdestvo bayramidan ikki kun avval muxlislar e’tiboriga havola qilingan. Birinchi marta Bobbi Xelms tomonidan kuylangan qo‘shiqsiz Yangi yil va Rojdestvo bayramlarini tasavvur qilib bo‘lmaydi.
Brenda Li “Rocking around the Christmas tree”
“Uyda yolg‘iz” filmidan yaxshi tanish bo‘lgan kompozitsiya birinchi marta 1958-yilda amerikalik xonanda Brenda Li tomonidan ijro qilingan. Ushbu qo‘shiqning boshqa ijrochilar tomonidan kuylangan versiyalar ko‘p ekaniga qaramay, bayram shukuhini his qilishga yordam beradigan originalini tinglash tavsiya qilinadi.
Izoh (0)