APL. “Manchester Yunayted” 8 ta gol urilgan o‘yinda Marselo Byelsa shogirdlarini tor-mor keltirdi
Futbol bo‘yicha Angliya Premyer Ligasining 14-turida “Manchester Yunayted” 20-dekabr, yakshanba kuni “Lids”ni qabul qildi.
Uchrashuvning dastlabki daqiqalaridayoq Skot Maktominey ikki bor mehmonlar darvozasini ishg‘ol qildi. 20-daqiqada Brunu Fernandesh hisobni yirik ko‘rinishga olib kelgan bo‘lsa, 37-daqiqada Viktor Lindelyof jamoasining to‘rtinchi golini urdi. Bunga “Lids” vakillari birinchi bo‘limda Liam Kuperning goli bilan javob qaytardi.
Ikkinchi bo‘lim ham gollarga boy bo‘ldi. 66-daqiqada Deniel Jeyms o‘z hisobiga gol yozdirib qo‘ydi, oradan ko‘p o‘tmay Fernandesh penaltini aniq amalga oshirgan holda dublini nishonladi. 74-daqiqada Styuart Dallas uzoq masofadan aniq zarba yo‘llab, mehmonlarning ikkinchi to‘pini kiritdi. Qolgan vaqtda hisob o‘zgarmadi.
Shu tariqa ushbu g‘alabadan keyin Ole-Gunnar Sulsher shogirdlari ochkolarini 26 taga yetkazib olgan holda 3-o‘ringa ko‘tarildi. Peshqadam “Liverpul”dan 5 ochko ortda borayotgan “qizil iblislar”da bitta zaxira o‘yini mavjud. “Lids” (17) esa 14-pog‘onada qoldi.
APL
14-tur bahslari
20-dekabr, yakshanba
“Manchester Yunayted” — “Lids” 6:2
Gollar: 1:0 – 2 Maktominey, 2:0 – 3 Maktominey, 3:0 – 20 Brunu Fernandesh, 4:0 – 37 Lindelyof, 4:1 – 41 Kuper, 5:1 – 66 Jeyms, 6:1 – 70, penalti Brunu Fernandesh, 6:2 – 73 Dallas.“Manchester Yunayted”: De Xea, Maguayr, Uan-Bissaka, Shou (Telles, 60), Lindelyof, Jeyms, Fred, Brunu Fernandesh (van de Bek, 71), Maktominey, Marsyal, Reshford (Kavani, 71).
“Lids”: Melye, Eyling, Dallas, Kuper (Devis, 72), Klix (Sheklton, 46), Harrison, Alioski, Fillips (Streyk, 46), Rafinya, Bemford, Rodrigo.
Ogohlantirish: Jeyms (52).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
