Toshkent viloyatidagi Eshonobod qishlog‘ida sezilarli o‘zgarishlar bo‘ldi

O‘zbekistonda Prezident tashabbusi bilan amalga oshirilayotgan “Obod qishloq” dasturi natijasida yangi qiyofaga kirgan yuzlab mahalla va qishloqlar qatoridan endi “Eshonobod” qishlog‘i ham joy oldi.

Ushbu qishloq Toshkent viloyati markazi Nurafshon shahridan 80 kilometr, Chinoz tumani markazidan 20 kilometr olisda, qo‘shni davlat bilan chegara hududda joylashgan.

Amalga oshirilgan keng ko‘lamli bunyodkorlik ishlari tufayli bu yerda yashayotgan qariyb 3 ming nafardan ziyod aholi hayotida sezilarli o‘zgarishlar yuz berdi. Qishloqda 2020-yilda qurilish-ta’mirlash, obodonlashtirish va ko‘kalamzorlashtirish ishlari olib borildi.

Xususan, qishloqning Fayzobod ko‘chasida zamonaviy mahalla markazi qad rostladi. Markazda mahalla fuqarolar yig‘ini raisi, uning o‘rinbosari va turli yo‘nalishlar bo‘yicha maslahatchilari, profilaktika inspektori o‘zaro uyg‘un va samarali faoliyat ko‘rsatishi uchun barcha sharoit yaratilgan.

Shuningdek, kutubxona va mutolaa zali, tumandagi Xalq qabulxonasi, Davlat xizmatlari markazining shoxobchalari, 3-sektor shtabi, tibbiyot punkti, bank filiali kabi odamlarga xizmat qiladigan obyektlar tashkil etilgan.

Yangi obyektlarni foydalanishga topshirishga bag‘ishlangan tadbirlarda Davlat va jamoat tashkilotlari, milliy madaniy markazlar vakillari jam bo‘lgan ushbu tadbirlarda Rossiya, Qozog‘iston, Qirg‘iziston, Tojikiston respublikalarining O‘zbekistondagi elchilari ham ishtirok etgan.

Qishloqda yangi barpo etilgan 200 o‘rinli madaniyat saroyida mashg‘ulotlarni boshlab yuborgan eshonobodlik san’atsevar yoshlar mehmonlarni o‘zlarining ijod namunalari bilan kutib olgan.

Yoshlarning kitobxonlik madaniyatini yuksaltirish, dam olish sharoitlarini yaxshilash uchun “Kitobxonlar bog‘i” barpo etildi. Bu xiyobon O‘zbekiston va jahondagi eng nodir me’moriy obidalarning ixcham maketlarini o‘zida mujassam etgan.

Aholini, ayniqsa, xotin-qizlarni ish bilan ta’minlash maqsadida zamonaviy tikuv korxonalari qurildi, unda ikki smenada 500 nafar xotin-qiz ishlaydi. Shu yerda xotin-qizlarga tikish-bichish sir-asrorini o‘rgatuvchi 200 o‘rinli zamonaviy o‘quv markazi ham ish boshlagan. Korxona oyiga 6 ming dona kiyim-kechak tayyorlash quvvatiga ega.