Блогер Никита Макаренко ўзининг Telegram’даги каналига IMEI кодни рўйхатга қўйиш қанчалик мураккаб жараён экани ҳақида қатор постларни жойлаштирди. У мобил қурилмасини рўйхатдан ўтказиш учун UzIMEI ташкилоти биносига боргани ва у ерда қандай тартибсизликка гувоҳ бўлгани ҳақида ёзган.
2019 йил 1 апрелдан Ўзбекистондаги мобил телефонлар махсус IMEI коди бўйича рўйхатга олиниши тартиби жорий этилган эди. Шундан буён ушбу тартиб мобил қурилмалардан фойдаланишда қатор муаммоларни юзага келтирмоқда.
Макаренко аввалига ўзига хос сўровнома эълон қилган:
«Ҳозир чет элдан келган телефонга IMEI код олиш учун бораман. Мени нима кутаётганини тахмин қилиб кўринг!
- Керакли бинони топа олмайман;
- Топаман, лекин у ерда тушлик вақти бўлади;
- Тўплаган ҳужжатларим етарли бўлмайди;
- Кейинроқ келинг, дейишади;
- Ҳаммаси ўхшайди!».
Кейинги постларида Макаренко UzIMEI биносида бошидан кечирганларини ҳикоя қилган: «Хўш, мен UzIMEI биносини топдим. Фақат дўстим қаердалигини тушунтирганидан кейин. Бино «Себзор» маҳалласи ичида жойлашган, унга олиб борадиган ҳеч қандай йўл кўрсаткич йўқ. Ичкарида катта навбат. Ҳеч қандай электрон навбат ҳақида гап бўлиши мумкин эмас, фақат «Ким охирги?» дейиш амалда.
«Рақамли хизматлар марказида 11 кишидан иборат жонли навбат Дижитал! Инновация! Ренессанс! Ҳурматли Шуҳрат Содиқов (ахборот технологиялари ва коммуникацияларни ривожлантириш вазири), Баҳром Олматов (вазир ўринбосари) пастга тушиб, тизимингиз қандай ишлаётганини кўринг», — деб ёзади блогер.
Макаренконинг таъкидлашича, UzIMEI’ни рўйхатдан ўтказиш 1 соат вақт олган. «Агар телефонни почта орқали олиб келишган бўлса, божхона декларациясини кўрсатиш керак бўлади. У ерда шунчаки ‘бардак’ ҳукм сурмоқда, навбат, фарзандлари совға қилиб юборган телефонлардан фойдалана олмаётган қариялар йиғламоқда, хорижликлар ҳайратдан ёқа ушлаб турибди», — дея қайд этади Макаренко.
Шунингдек, у Ўзбекистонда бундай тизим бўлмаслиги кераклигини, унинг мавжудлигини фақат коррупция билан изоҳлаш мумкинлигини таъкидлаган.
«Бу шунчаки уқувсизлик ва нопрофессионаллик. Бундай нарсани ўйлаб топган ва жорий қилганларни лаънатлайман. Улар ислоҳотларнинг ҳақиқий душмани», — деб якунлаган Никита Макаренко серияли постларини.
Яна бир таниқли блогер, иқтисодчи Отабек Бакиров Макаренконинг постига муносабат билдирган. «UzIMEI халқ ва мамлакатга зараркунандалик қилиш эвазига бойлик орттириш учун яралган. Уни ислоҳ қилиб бўлмайди. UzIMEI тугатилиши керак. Зараркунандалик билан бойлик орттираётган, халқ ва мамлакатни талаётганлар эса маҳкамага тортилиши лозим», — деб ёзган Бакиров.
Мавзуга доир:
Кейинроқ Давлат божхона қўмитаси ушбу муаммоли масала юзасидан бир қатор чоралар амалга оширилганини ҳамда IMEI кодларини бошқа шахслар номига рўйхатдан ўтказиш билан шуғулланган жиноий гуруҳ фош этилганини маълум қилди.
22 сентябрь куни мобил қурилмаларнинг IMEI кодларини рўйхатдан ўтказиш тизими маъмурияти томонидан мобил қурилмаларни UzIMEI тизимида рўйхатдан ўтказиш жараёнига ўзгартириш киритилгани маълум қилинди. Ушбу тартибга кўра, қурилманинг IMEI кодини/кодларини рўйхатдан ўтказишда жисмоний шахслар томонидан фойдаланиладиган абонент рақами маҳаллий мобил операторларидан ариза берувчи номига расмийлаштирилган бўлиши керак. Бироқ қатор ОАВ ва блогерлар мазкур ўзгариш қонунга зид равишда амалга оширилган бўлиши мумкин, деб ҳисобламоқда.
Изоҳ (0)