O‘zbekistonda IIV tizimidagi boshqarma tomonidan 10 oy davomida korrupsiya bilan bog‘liq 673 ta jinoyat aniqlandi – vazirlik vakili

O‘zbekiston IIV tizimidagi Korrupsiya va iqtisodiy jinoyatchilikka qarshi kurash boshqarmasi va uning hududiy bo‘limlari tomonidan 2020-yilning 10 oyi davomida olib borilgan tezkor tadbirlar natijasida korrupsiya bilan bog‘liq 673 ta jinoyat ishlari aniqlangan. Bu haqda AOKA huzuridagi brifingda ichki ishlar vaziri o‘rinbosari, polkovnik Rustam Xatamov ma’lum qildi.

Qayd etilishicha, Korrupsiyaga va iqtisodiy jinoyatchilikka qarshi kurash boshqarmasi ushbu jinoyatlarga aloqador 126 ta guruhni qo‘lga olib, 841 nafar shaxsga nisbatan jazo tayinlagan.

Korrupsiya bilan bog‘liq jinoyatlarning asosiy qismini 85 tasi poraxo‘rlik, 51 tasi tovlamachilik va 313 tasi firibgarlik jinoyati tashkil etadi.

Ma’lum qilinishicha, korrupsion jinoyatlar asosan ijtimoiy sohada, hokimiyat idoralarida, o‘rta va kichik biznesda hamda agrosanoat kompleksida sodir etilgan.

IIV Korrupsiya va iqtisodiy jinoyatchilikka qarshi kurash boshqarmasi tashabbusi bilan aholi orasida eng ko‘p shov-shuvga sabab bo‘lgan ishga jo‘natish yoki avtotransport vositasini olib berishga va’da berib 33 mingdan oshiq fuqarodan 179,7 milliard so‘m va 11,8 million AQSh dollari firibgarlik bilan qo‘lga kiritilgan holat bo‘yicha 66 nafar shaxsga 24 ta jinoyat ishi ochilgan.

Hozirda mazkur jinoyat ishlarini 15 tasi sudga oshirilib 89,5 milliard so‘m zarar to‘liq qoplandi.

Xususan, 2020-yil 4-oktabrda Fuqarolik ishi bo‘yicha Urganch tumanlararo sudi sudyasi Saparbayev Otabek mansab vakolatidan foydalanib fuqaro Rajabovga 800 metr kvadrat yer maydoniga bo‘lgan huquqini fuqarolik tartibida qonuniy belgilab berishini aytib, evaziga talab qilgan 10 ming AQSh dollaridan 1200 AQSh dollarini olgan vaqtida ushlangan.