Бекободда нархи 150 минг долларгача баҳоланувчи 7 бош ноёб лочинни Ўзбекистондан олиб чиқиб кетмоқчи бўлган шахс ушланди

Тошкент вилоятининг Бекобод туманида «Қизил китоб»га киритилган 7 бош ноёб лочинни Ўзбекистондан олиб чиқиб кетмоқчи бўлган шахс ушланди. Бу ҳақда Божхона қўмитаси матбуот хизмати хабар берди.

Қайд этилишича, Тошкент вилояти божхона бошқармаси Контрабандага қарши курашиш ва божхона аудити бўлими томонидан Давлат хавфсизлик хизмати ходимлари билан биргаликда Ўзбекистонда йўқолиб бораётган жонзотларнинг божхона чегаралари орқали ноқонуний равишда олиб чиқиб кетилишининг олдини олишга қаратилган тезкор тадбир ўтказилган.

Шаҳарнинг чегарадош ҳудудида ҳаракатланаётган шахс тезкор ходимлар томонидан кузатувга олинганини сезиб қолгач, шу ердаги уйлардан бирига қочиб киради ва яширинишга уринган. Мазкур хонадон белгиланган тартибда кўздан кечирилиб, қочишга уринган шахснинг қўлидаги сумка очиб кўрилганида, унинг ичида 7 бош лочин борлиги аниқланган.

«Ноқонуний равишда олиб ўтишда атрофдагиларга сездирмаслик мақсадида қушларнинг кўзи, оёқлари боғлаб қўйилган, қанотлари эса скотчланган. Шунингдек, улар сумкага зич ҳолатда жойлаштирилган бўлиб, бу ҳолатни қушларга нисбатан ваҳшийлик деб изоҳлаш мумкин», — деб қайд этилган қўмита хабарида.

Маълум қилинишича, айни пайтда лочинлар Тошкент ҳайвонот боғида сақланмоқда. Келтирилган куни уларнинг 4 нафари оғир аҳволда бўлган. Ҳайвонот боғи ветеринарлари томонидан кўрсатилган муолажа ва парваришлардан сўнг уларнинг ҳолати яхшиланган.

Амалдаги тартибларга кўра, лочинларга чип ўрнатилди ва энди улар Халқаро реестрга киритилди. 90 кунлик карантин шароитидаги парваришдан сўнг лочинлар яна она-табиат қўйнига учириб юборилади.

Ўзбекистоннинг 2019 йилда чоп этилган «Қизил китоб»ига «Итолғи» номи билан киритилган ушбу лочинлар асосан Ғарбий Тян-Шан ва Ҳисор-Олой тоғ тизмалари ҳамда Қизилқум чўлида учрайди. Сўнгги ҳисоб-китобларга кўра, мамлакатимизда бу каби «Итолғи» лочинлари кескин камайиб, ҳозирда атиги 70 жуфт сақланиб қолгани тахмин қилинади.

Лочинларни ноқонуний равишда олиб чиқишга уринган шахслар уларнинг ҳар бирининг баҳосини ўртача 30 миллион сўмдан эканлигини таъкидлашган. Ваҳоланки, дунё бўйлаб қора бозорларда лочинларнинг нархи 15 минг доллардан 150 минг долларгача баҳоланади. Уларнинг қўлга ўргатилганлари эса ҳаттоки бир неча миллион доллар туради.

Ҳозирда мазкур ҳолат юзасидан божхона органлари томонидан суриштирув ҳаракатлари давом эттирилмоқда.