O‘zbekistonda “Xususiy bandlik agentliklari to‘g‘risida”gi qonunga kiritilgan o‘zgartirish va qo‘shimchalar 14-noyabrdan kuchga kirishi ortidan bir qator xususiy bandlik agentlik (XBA)lari o‘z litsenziyalarini bekor qilishni so‘rab, Tashqi mehnat migratsiyasi agentligi (TMMA)ga murojaat qilgan. Bu haqda TMMA boshlig‘i Muhammadzokir Mamatxonov ma’lum qildi.
O‘zgartishlarga ko‘ra, endi O‘zbekistondan tashqarida ish qidirayotgan shaxslardan xorijda ishga joylashtirish bo‘yicha xizmatlar uchun haq olish mumkin emas — xizmat haqini faqat xorijiy ish beruvchidan olish mumkin. Shuningdek, fuqarolarni ishga joylashtirish sohasida ko‘rsatiladigan axborot va maslahat xizmatlarining qiymati bazaviy hisoblash miqdorining bir baravari (6-dekabr holatiga ko‘ra — 223 ming so‘m)dan oshmasligi kerak.
Muhammadzokir Mamatxonovning ta’kidlashicha, qonunga o‘zgartish va qo‘shimchalar kiritishdan ko‘zlangan asosiy maqsad — sohada yuzaga kelgan va kelayotgan muammolarning oldini olishdir. Qayd etilishicha, o‘tgan davr mobaynida xususiy bandlik agentliklari tomonidan aldov yo‘li bilan 9 338 nafar fuqarodan salkam 80 milliard so‘m mablag‘ firibgarlik yo‘li bilan o‘zlashtirib olingan.
“O‘zgartishlarga muvofiq, endi xususiy bandlik agentliklari xorijga ishga joylash bo‘yicha tegishli litsenziyani qo‘lga kiritish uchun Mehnat vazirligi huzuridagi tegishli jamg‘armada bazaviy hisoblash miqdorining 8500 baravari (6-dekabr holatiga ko‘ra — 1,89 milliard so‘m) miqdorida zaxira mablag‘ini shakllantirishi ham belgilandi. Shuningdek, har bir fuqaro bilan tuzilgan shartnoma vazirlik axborot tizimida hisobga qo‘yiladi”, — dedi Mamatxonov.
Avvalroq O‘zbekistondagi 20 ta xususiy bandlik agentligining litsenziyasi yangilangan qonun talablarini bajarmagani bois vaqtincha to‘xtatib qo‘yilgani haqida xabar berilgan edi. So‘nggi bir yarim yil ichida mamlakatda 50 dan ortiq XBAning faoliyati to‘xtatilgan.
Mavzuga doir:
- O‘zbekistonda 2600 dan ortiq kishini chuv tushirgan International Job Organization XBA rahbari ustidan sud boshlandi
- Toshkentda odamlarni qariyb 1,5 mlrd so‘mga chuv tushirgan xususiy bandlik agentligi mansabdorlariga sud hukmi o‘qildi
- Toshkentda 1100 dan ortiq fuqaroni 6,2 mlrd so‘mga chuv tushirgan xususiy bandlik agentligining kirdikorlari fosh qilindi
- Fuqarolarni Koreyada ishlashga jo‘natishni va’da qilgan agentlikdan jabr ko‘rganlarning pullarini qaytarish boshlandi
- “Korean and migrations” xususiy bandlik agentligi mansabdorlariga tayinlangan sud hukmiga qisman o‘zgartirish kiritildi
- Samarqandda xorijga ishga jo‘natish bahonasida 300 dan ortiq odamni chuv tushirgan “Amilee Bahora” xususiy bandlik agentligi rahbarlariga sud hukmi o‘qildi
Izoh (0)