AQShda koronavirus infeksiyasining kunlik o‘sishida navbatdagi antirekord ko‘rsatkich qayd etildi. Mamlakatda 5-dekabr, shanba kuni 227 mingdan ortiq yangi holat qayd etildi, deya xabar bermoqda “RIA Novosti”.

Foto: AP Photo

Qayd etilishicha, so‘nggi 24 soat ichida AQShda 227 885 ta yangi holat qayd etilgan. 2607 nafar bemor kasallik asoratlari oqibatida vafot etgan.

Jons Hopkins universiteti ma’lumotlariga ko‘ra, AQShda pandemiya boshlanganidan beri 14,3 milliondan ortiq koronavirus bilan kasallanish holati qayd etilgan. Shu vaqt mobaynida 279 mingdan ortiq odam vafot etgan, 5,4 milliondan ortiq odam esa kasallikdan forig‘ bo‘lgan.

Eslatib o‘tamiz, AQSh dunyoda koronavirus qayd etilishi bo‘yicha birinchi o‘rinda turibdi. Ro‘yxatda undan so‘ng Hindiston (9,6 million) va Braziliya (6,5 million) bormoqda.

Avvalroq koronavirusga qarshi vaksina yaratgan BioNTech kompaniyasi rahbari dunyodagi eng boy 500 odam qatoriga kirgani hamda Jo Bayden jamoatchilik oldida koronavirusga qarshi emlanishga va’da bergani xabar qilingandi.