Amerikaning yirik OAVlari tomonidan AQShning saylangan prezidenti deb e’tirof etilayotgan Jo Bayden jamoatchilik oldida koronavirus infeksiyasiga qarshi emlanishga tayyorligini bildirdi. Bu haqda “RBK” xabar bermoqda.

Foto: Getty Images

“Men buni mamnuniyat bilan amalga oshiraman”, — dedi Bayden.

Siyosatchi shu tariqa inauguratsiyagacha vaksina olish-olmasligi hamda buni AQShning sobiq prezidentlari kichik Jorj Bush, Bill Klinton va Barak Obama kabi jamoatchilik oldida amalga oshirishga tayyor yoki yo‘qligi haqidagi savolga javob berdi.

Baydenning aniqlik kiritishicha, AQSh allergik va yuqumli kasalliklar milliy instituti direktori Entoni Fauchi vaksinaning xavfsizligini e’tirof etishi bilan uni olishga tayyor bo‘ladi.

Baydenning so‘zlariga ko‘ra, AQSh xalqining vaksina samaradorligiga nisbatan ishonchi tushib keta boshlagan, shuning uchun siyosiy yetakchilar amerikaliklarga shaxsan namuna ko‘rsatishi muhimdir.

Avvalroq AQShning sobiq prezidentlari Barak Obama, Jorj Bush va Bill Klinton kamera qarshisida koronavirusga qarshi vaksina bilan emlanib, jamoatchilikning xavfsizlikka bo‘lgan ishonchini oshirishga tayyorligini bildirgan edi.

Amaldagi AQSh prezidenti Donald Tramp ham AQShda birinchi bo‘lib koronavirusga qarshi vaksinani qabul qilishga tayyorligi haqida aytgan edi. “Men mamnuniyat bilan vaksinani qo‘llaydigan birinchi odam bo‘lishga tayyorman… asosiysi — Amerika xalqiga foyda keltirish”, — degan u.

Rossiya prezidentining matbuot kotibi Dmitriy Peskov amerikalik siyosatchilarning qarorini izohlar ekan, Rossiya hukumati vakillari allaqachondan buyon xuddi shu yo‘ldan ketayotganligini aytdi. Ammo u Vladimir Putin ham fuqarolar uchun shunday namuna ko‘rsatish-ko‘rsatmasligiga aniqlik kiritmadi. Matbuot kotibi prezident emlanish borasida “o‘z qarorini bildirish”ga va’da berganini eslatdi.