Qimmatbaho uylar, mashinalar, golf va reklama shartnomalari. “Qizil mashina” “motori” Robert Levandovski qanday hayot kechiradi?

So‘nggi o‘n yillikning eng yaxshi hujumchilari haqida gap ketganda, Messi va Ronaldudan keyin, albatta, Robert Levandovski tilga olinadi. Bunga esa yetarlicha sabablar bor. Polshalik hujumchi ketma-ket mavsumlar davomida barqarorlikni saqlashdan tashqari yildan yilga o‘sib ham bormoqda. U deyarli har bir o‘yinda gol uradi, yil oxiriga borib esa rekordlarni qatorlatib tashlaydi. Uning yagona kamchiligi — “yerlik bo‘lmagan” daholar bilan bir davrda o‘ynayotgani. Futbol ixlosmandlarini esa “qizil mashina” (“Bavariya”) motorining (Levandovski) maydondagi harakatlaridan tashqari uning qanday hayot kechirishi ham birdek qiziqtiradi. Quyida Levandovskining yashash tarzi, mashinalari, daromadi, shaxsiy hayoti haqidagi savollarga javob berishga harakat qilamiz.

Levandovski qayerda yashaydi?

Hujumchining Germaniyada ko‘chmas mulki yo‘q, ammo Polshada uning butun boshli ikkita uyi bor. Myunxenda Robert “Bavariya” tomonidan ijaraga olingan uyda yashaydi.

Levaning Varshavadagi uyi “Zloto 44” nomli minorada joylashgan. Ushbu ko‘p qavatli minoradagi uyning qiymati 7 million funt sterlingni tashkil etadi. Minorada, shuningdek, sport ko‘ngilochar markazi, kinoteatr, sport zali, hatto golf maydonchasi va sharoblar saqlanadigan ombor mavjud.

Levandovskining ikkinchi uyi esa Polshaning shimoli-sharqidagi Mazur ko‘li qirg‘og‘ida joylashgan.

Futbolchining ikki qavatli hashamatli uyi butunlay yog‘ochdan qurilgan. U yerda Robert oilasi va eng yaqin do‘stlari bilan dam olishni yaxshi ko‘radi.

Bu yerda polshalik forvard ekstremal suv skuterlarini boshqarishni xush ko‘radi. Polsha ommaviy axborot vositalarining yozishicha, ushbu qasr Levaga naq 8 million yevroga tushgan.

Levandovski qanday mashinalarda yuradi?

Germaniya Bundesligasining eng yaxshi forvardi tabiiyki, eng yaxshi garajga ham ega. Uning dastlabki avtoulovi Ferrari F12 Berlinetta bo‘lgan. Ushbu avtomobil uchun Robert 280 ming yevro to‘lagan.

Uning to‘plamdagi ikkinchi mashina Porsche Cayenne GTS bo‘lib, bir vaqtlar “Borussiya” muxlislari uning g‘ildiraklarini yechib ketgandi.

Shuningdek, Levandovskining garajida Mercedes CL 63 (40 ming yevro) Lamborghini Gallardo (300 ming yevro), Maserati Granturismo’ni (116 ming dollar) ko‘rish mumkin.

Levandovskining shaxsiy hayoti

Robert bo‘lajak turmush o‘rtog‘i Anna bilan 2007-yilda Varshava ta’lim va sport maktabi talabalari uchun tashkil etilgan seminarda tanishgan. 2013-yilning 22-iyun sanasida esa juftlik munosabatlarini rasmiylashtiradi va keng miqyosdagi to‘y marosimini o‘tkazadi. Marosimga uch mingga yaqin odam taklif qilinadi. Anna karate bo‘yicha qora belbog‘ sohibi hisoblanadi, u Jahon va Yevropa chempionatlarida bir necha bor sovrindor bo‘lgan. 2016 va 2020-yilda oilada ikki bor qiz farzandlar dunyoga keladi, qizaloqlarga Klara hamda Lora ismlari beriladi. Bugungi kunda Robert va Anna Levandovski barcha yosh polyaklar uchun ideal juftlik va namuna sifatida qabul qilinadi.

Levandovskining do‘stlari kim?

Futbolchi odatda vaqtini rafiqasi va qizi bilan birgalikda o‘tkazadi. Shunga qaramay, uning bir qancha do‘stlari bor. Futbolchilar orasida esa Robertning eng yaqin do‘sti Marko Roysdir.

Ularning do‘stligi Levaning “Borussiya D”ga o‘tganida boshlangan. Robert “Bavariya”ga ko‘chib o‘tgandan so‘ng ham do‘stlar muloqotni to‘xtatmadi va bugungi kunda ham ular tez-tez uchrashib turadi.

Levandovski futboldan tashqari nimalarga qiziqadi?

Levandovski ham ko‘plab futbolchilar singari, futboldan tashqari basketbolni yaxshi ko‘radi, biroq bu shunchaki so‘zda emas, polshalik bu borada “Bavariya”dagi eng yaxshisi hisoblanadi.

Bundan tashqari, yuqorida ta’kidlanganidek, u suv transportlarini boshqarishni yaxshi ko‘radi.

Shuningdek, uning qiziqish doiralaridan golf, boks va qo‘shiq kuylash ham o‘rin olgan.

Levandovskining daromadi qancha?

Robert “Bavariya” bilan shartnomasiga ko‘ra, yiliga 15 million yevro miqdorida maosh oladi. Biroq avvalgi maqolalarda ham ta’kidlanganidek, charm to‘p ustalari faqat maosh bilan cheklanmaydi.

Robert Huawei brendining Polshadagi yuzi, shuningdek, sport ichimliklar toifasida Polsha bozorining yetakchisi Oshee’ning elchisi hisoblanadi.

Ammo Levandovskining eng katta hamkori, bu Nike. Ushbu hamkorliklarning barchasidan forvard yiliga, taxminan, 5 million yevro daromad ko‘radi.

Mavzuga doir: Uzoq kutilgan qirol — Robert Levandovski haqida