Қимматбаҳо уйлар, машиналар, гольф ва реклама шартномалари. «Қизил машина» «мотори» Роберт Левандовски қандай ҳаёт кечиради?

Сўнгги ўн йилликнинг энг яхши ҳужумчилари ҳақида гап кетганда, Месси ва Роналдудан кейин, албатта, Роберт Левандовски тилга олинади. Бунга эса етарлича сабаблар бор. Польшалик ҳужумчи кетма-кет мавсумлар давомида барқарорликни сақлашдан ташқари йилдан йилга ўсиб ҳам бормоқда. У деярли ҳар бир ўйинда гол уради, йил охирига бориб эса рекордларни қаторлатиб ташлайди. Унинг ягона камчилиги — «ерлик бўлмаган» даҳолар билан бир даврда ўйнаётгани. Футбол ихлосмандларини эса «қизил машина» («Бавария») моторининг (Левандовски) майдондаги ҳаракатларидан ташқари унинг қандай ҳаёт кечириши ҳам бирдек қизиқтиради. Қуйида Левандовскининг яшаш тарзи, машиналари, даромади, шахсий ҳаёти ҳақидаги саволларга жавоб беришга ҳаракат қиламиз.

Левандовски қаерда яшайди?

Ҳужумчининг Германияда кўчмас мулки йўқ, аммо Польшада унинг бутун бошли иккита уйи бор. Мюнхенда Роберт «Бавария» томонидан ижарага олинган уйда яшайди.

Леванинг Варшавадаги уйи «Злото 44» номли минорада жойлашган. Ушбу кўп қаватли минорадаги уйнинг қиймати 7 миллион фунт стерлингни ташкил этади. Минорада, шунингдек, спорт кўнгилочар маркази, кинотеатр, спорт зали, ҳатто голф майдончаси ва шароблар сақланадиган омбор мавжуд.

Левандовскининг иккинчи уйи эса Польшанинг шимоли-шарқидаги Мазур кўли қирғоғида жойлашган.

Футболчининг икки қаватли ҳашаматли уйи бутунлай ёғочдан қурилган. У ерда Роберт оиласи ва энг яқин дўстлари билан дам олишни яхши кўради.

Бу ерда польшалик форвард экстремал сув скутерларини бошқаришни хуш кўради. Польша оммавий ахборот воситаларининг ёзишича, ушбу қаср Левага нақ 8 миллион еврога тушган.

Левандовски қандай машиналарда юради?

Германия Бундеслигасининг энг яхши форварди табиийки, энг яхши гаражга ҳам эга. Унинг дастлабки автоулови Ferrari F12 Berlinetta бўлган. Ушбу автомобиль учун Роберт 280 минг евро тўлаган.

Унинг тўпламдаги иккинчи машина Porsche Cayenne GTS бўлиб, бир вақтлар «Боруссия» мухлислари унинг ғилдиракларини ечиб кетганди.

Шунингдек, Левандовскининг гаражида Mercedes SL 63 (40 минг евро) Lamborghini Gallardo (300 минг евро), Maserati Granturismo’ni(116 минг доллар) кўриш мумкин.

Левандовскининг шахсий ҳаёти

Роберт бўлажак турмуш ўртоғи Анна билан 2007 йилда Варшава таълим ва спорт мактаби талабалари учун ташкил этилган семинарда танишган. 2013 йилнинг 22 июнь санасида эса жуфтлик муносабатларини расмийлаштиради ва кенг миқёсдаги тўй маросимини ўтказади. Маросимга уч мингга яқин одам таклиф қилинади. Анна каратэ бўйича қора белбоғ соҳиби ҳисобланади, у Жаҳон ва Европа чемпионатларида бир неча бор совриндор бўлган. 2016 ва 2020 йилда оилада икки бор қиз фарзандлар дунёга келади, қизалоқларга Клара ҳамда Лора исмлари берилади. Бугунги кунда Роберт ва Анна Левандовски барча ёш поляклар учун идеал жуфтлик ва намуна сифатида қабул қилинади.

Левандовскининг дўстлари ким?

Футболчи одатда вақтини рафиқаси ва қизи билан биргаликда ўтказади. Шунга қарамай, унинг бир қанча дўстлари бор. Футболчилар орасида эса Робертнинг энг яқин дўсти Марко Ройсдир.

Уларнинг дўстлиги Леванинг «Боруссия Д»га ўтганида бошланган. Роберт «Бавария»га кўчиб ўтгандан сўнг ҳам дўстлар мулоқотни тўхтатмади ва бугунги кунда ҳам улар тез-тез учрашиб туради.

Левандовски футболдан ташқари нималарга қизиқади?

Левандовски ҳам кўплаб футболчилар сингари, футболдан ташқари баскетболни яхши кўради, бироқ бу шунчаки сўзда эмас, польшалик бу борада «Бавария»даги энг яхшиси ҳисобланади.

Бундан ташқари, юқорида таъкидланганидек, у сув транспортларини бошқаришни яхши кўради.

Шунингдек, унинг қизиқиш доираларидан гольф, бокс ва қўшиқ куйлаш ҳам ўрин олган.

Левандовскининг даромади қанча?

Роберт «Бавария» билан шартномасига кўра, йилига 15 миллион евро миқдорида маош олади. Бироқ аввалги мақолаларда ҳам таъкидланганидек, чарм тўп усталари фақат маош билан чекланмайди.

Роберт Huawei брендининг Польшадаги юзи, шунингдек, спорт ичимликлар тоифасида Польша бозорининг етакчиси Оshее’нинг элчиси ҳисобланади.

Аммо Левандовскининг энг катта ҳамкори, бу Nike. Ушбу ҳамкорликларнинг барчасидан форвард йилига, тахминан, 5 миллион евро даромад кўради.

Мавзуга доир: Узоқ кутилган қирол — Роберт Левандовски ҳақида