Kasilyasdan Kokegacha. Krishtianu Ronaldu bilan chiqisha olmagan dunyo futboli yulduzlari haqida

Krishtianu Ronaldu, shubhasiz, futbol olamining eng mashhur vakillaridan biri bo‘lib, uning ko‘p sonli muxlislaridan tashqari, undan nafratlanuvchilar ham talaygina. Demak, quyida Krishtianu Ronaldu bilan murosa qilolmagan va undan nafratlanuvchi futbolchilar haqida fikr yuritamiz.

Iker Kasilyas

Ajablanarlisi, Ronaldu ko‘p hollarda aynan jamoadoshlari bilan kelisha olmagan. Barchaga ma’lumki, portugaliyalik o‘zini juda yaxshi ko‘radi va u har qanday tanqidni o‘ziga qabul qiladi. Biroq bu aksariyat futbolchilarga yoqmaydi. Mish-mishlarga ko‘ra, aynan shu sababli kiyinish xonasida ko‘plab kelishmovchiliklar sodir bo‘lgan, klub rahbariyati esa hatto “Real” futbolchilaridan agar ular Messini Ronaldudan yaxshiroq deb o‘ylasa, bu haqida OAVga intervyu bermaslikni so‘ragan. Ammo “qaymoqranglilar”ning afsonaviy darvozaboni Iker Kasilyas bu cheklovlarga amal qilmaydi va intervyularidan birida Messining zarbalari dunyodagi har qanday darvozabon uchun muammo bo‘lishini aytadi.

Bu esa tabiiyki, Ronalduga tegib ketadi va hattoki ularning janjallashishgacha borgani aytiladi. Ammo mojaroning eng yuqori nuqtasi jamoa boshqaruviga Mourinyoning kelgani bo‘lgandi. Gap shundaki, Mour Iker bilan til topisha olmadi va uni zaxiraga mixlab qo‘ydi. Shunda Kasilyas jamoadoshlari, shu jumladan, Ronaldudan ham yordam so‘raydi. Ammo portugaliyalik eski arazlarni yodga olib, Mourinyoning tarafini oladi. Keyin esa afsona klubdan juda xunuk tarzda quvildi. Aytishlaricha, ular bugungi kunda ham bir-birini xushlamaydi.

Fernando Torres

Ispaniyalik hujumchini ziddiyatli futbolchi deb hisoblash qiyin. Boisi Torres doimo o‘zining oliyjanobligi bilan ajralib turgan. Ammo Ronaldu Fernandoning jahlini chiqarishning uddasidan chiqqan. Ular orasidagi ziddiyat Chempionlar Ligasining yarim final javob o‘yinida sodir bo‘ladi. Krishtianu birinchi uchrashuvda het-trik qayd etgani uchun ikkinchi o‘yinda o‘ta xotirjam harakat qiladi. Ronalduning maydondagi xurmacha qiliqlari esa Torresga yoqmadi va unga shunday deydi: “Masxaraboz, sen bilan nima sodir bo‘lmoqda?” Krish esa bunga javoban: “Hech narsa, shunchaki sizlar uyga ketyapsiz, ahmoq”, deydi. Ushbu o‘yindan so‘ng Torres bir necha bor Ronalduning sha’niga qo‘pol gaplarni yog‘diradi va undan nafratlanishini ochiqchasiga aytadi.

Rud van Nistelroy

Ronalduning yana bir undan nafratlanuvchi jamoadoshi, bu Nistelroy edi. Biroq bu yerda vaziyat anchayin jiddiy edi. Rud “Manchester Yunayted”ning haqiqiy afsonasi va ko‘p yillik asosiy hujumchisi edi, ammo Ronaldu jamoaga qo‘shilishi bilan ular orasida kelishmovchilik yuzaga keladi. Bunga Krishtianuning doimiy ravishda fint qilishi, o‘yinni o‘z qo‘liga olishi va vaziyatlarni o‘zi yakunlashi sabab bo‘lgan. Tabiiyki, Rudga bu holat umuman yoqmaydi va undan to‘pni o‘ziga oshirishni so‘raydi, biroq bu juda kamdan kam holatlarda yuz berardi. Shu sabab ular kiyinish xonasida bir-biri bilan yoqalashib ketadi. Bu haqida Rio Ferdinand o‘zining avtobiografik kitobida yozgandi.

Simau Sabroza

Ehtimol, hozirgi yoshlar ushbu futbolchining kim ekanligini bilmas. Biroq u o‘z vaqtida yulduzli Portugaliya terma jamoasining sardori edi va hamma uni hurmat qilardi. Afsuski, bularning barchasi Ronaldu kelguniga qadar edi. Ular o‘rtasida sardorlik bog‘ichi uchun kurash kechdi. Simau jamoa faxriysi bo‘lsa, Ronaldu o‘zini haqiqiy yetakchi deb hisoblardi. Shu sababli u ochiqchasiga ushbu bog‘ichni olish istagini bildirdi va hattoki mamlakat futbol federatsiyasiga ultimatum qo‘ydi. Natijada Simau sardorlikdan mahrum etildi. Shundan so‘ng u terma jamoadagi faoliyatini yakunlaganini e’lon qiladi. Shu tarzda Krishtianu o‘zi uchun yana bir dushman orttirib oladi.

Koke

Bu “Real” — “Atletiko” uchrashuvlarida sodir bo‘lgan eng mashhur voqealardan biri edi. O‘yin vaqtida ehtiroslar shunchalik baland ediki, futbolchilar o‘zlarini boshqara olmay qolgandi. Ko‘plab to‘qnashuv va undovlardan so‘ng Ronaldu Kokega zarba beradi, shundan so‘ng ular bir-birini qo‘pol haqoratlar bilan siylay boshlaydi. Dastlab bu katta uchrashuv uchun odatiy holat bo‘lib tuyuladi, ammo voqea jiddiy tus olib ketadi. Shunda Koke Ronalduni notabiiy g‘oyalar asosida hayot kechirishda ayblaydi. Bunga javoban Ronaldu Kokega undan boyroq ekanini aytadi. Shundan so‘ng ular o‘rtasida haqiqiy adovat paydo bo‘ladi.