Prezident Shavkat Mirziyoyev 23-noyabr kuni Toshkent shahrida yo‘l-transport infratuzilmasini rivojlantirishga oid konsepsiya taqdimoti bilan tanishdi. Bu haqda Prezident matbuot xizmati xabar berdi.
Ma’lum qilinishicha, Toshkent shahrida yo‘l infratuzilmasi va jamoat transporti tizimini takomillashtirish bo‘yicha bosh rejaning dastlabki loyihasi ishlab chiqildi.
Taqdimotda Toshkent shahrida jamoat transportini yaxshilash masalasiga alohida e’tibor qaratildi. Davlat rahbari yo‘lovchi tashish xizmatlaridan aholi mutlaqo norozi ekanini ta’kidladi. “Masalan, 79 ta yo‘nalishdagi avtobuslar intervali tig‘iz paytlarda 30 daqiqagacha kechikmoqda. Oqibatda odamlar boshqa transport vositalaridan foydalanishni afzal bilmoqda. Bugungi kunda shahar jamoat transportida bor-yo‘g‘i 33 foiz yo‘lovchi yurmoqda. Rivojlangan mamlakatlar poytaxtida bu ko‘rsatkich 60-70 foizni tashkil etadi”, deyiladi Prezident matbuot xizmati axborotida.
Shu bois mavjud infratuzilmani yaxshilab, jamoat transporti harakatining tezligi va aholi uchun qulayligini ta’minlash vazifa qilib qo‘yildi.
Davlat rahbari jamoat transporti tizimida yangi boshqaruv uslubini joriy etish, metropoliten, avtosaroylar va yo‘nalishli taksi korxonalarini bir-biriga bog‘lash, axborot texnologiyalari asosida ularning o‘zaro integratsiyasini ta’minlash kerakligini ta’kidladi.
Buning uchun metropolitenni boshqarish hamda “Toshshahartransxizmat” aksiyadorlik jamiyatining buyurtmachi va nazorat funksiyalari shahar transport boshqarmasiga o‘tkaziladi. Moliyalashtirish ham boshqarma tomonidan amalga oshirilib, transport korxonalariga haqiqiy bajarilgan ish hajmi, bosib o‘tilgan masofaga qarab mablag‘ ajratiladi.
“Toshshahartransxizmat” jamiyatini to‘liq transformatsiya qilish, Transport universiteti faoliyatini takomillashtirish zarurligi ko‘rsatib o‘tildi.
Eslatib o‘tamiz, Toshkent shahar transport boshqarmasi boshlig‘i Anvar Jo‘rayev 2020-yilning avgust oyida o‘tkazilgan brifingda yaqin 3 oyda Toshkent shahrida jamoat transporti yo‘nalish tarmog‘i optimallashtirilishini ma’lum qilgandi.
Ma’lumot uchun, ayni paytda Toshkent metropoliteni “O‘zbekiston temir yo‘llari” kompaniyasi tarkibiga kiradi. Toshkent metropoliteni unitar korxonasi boshlig‘i bir vaqtning o‘zida “O‘zbekiston temir yo‘llari” AJ raisining o‘rinbosari hisoblanadi.
Izoh (0)