Тошкент метрополитенини бошқариш шаҳар транспорт бошқармасига ўтказилади

Президент Шавкат Мирзиёев 23 ноябрь куни Тошкент шаҳрида йўл-транспорт инфратузилмасини ривожлантиришга оид концепция тақдимоти билан танишди. Бу ҳақда Президент матбуот хизмати хабар берди.

Маълум қилинишича, Тошкент шаҳрида йўл инфратузилмаси ва жамоат транспорти тизимини такомиллаштириш бўйича бош режанинг дастлабки лойиҳаси ишлаб чиқилди.

Тақдимотда Тошкент шаҳрида жамоат транспортини яхшилаш масаласига алоҳида эътибор қаратилди. Давлат раҳбари йўловчи ташиш хизматларидан аҳоли мутлақо норози эканини таъкидлади. «Масалан, 79 та йўналишдаги автобуслар интервали тиғиз пайтларда 30 дақиқагача кечикмоқда. Оқибатда одамлар бошқа транспорт воситаларидан фойдаланишни афзал билмоқда. Бугунги кунда шаҳар жамоат транспортида бор-йўғи 33 фоиз йўловчи юрмоқда. Ривожланган мамлакатлар пойтахтида бу кўрсаткич 60-70 фоизни ташкил этади», дейилади Президент матбуот хизмати ахборотида.

Шу боис мавжуд инфратузилмани яхшилаб, жамоат транспорти ҳаракатининг тезлиги ва аҳоли учун қулайлигини таъминлаш вазифа қилиб қўйилди.

Давлат раҳбари жамоат транспорти тизимида янги бошқарув услубини жорий этиш, метрополитен, автосаройлар ва йўналишли такси корхоналарини бир-бирига боғлаш, ахборот технологиялари асосида уларнинг ўзаро интеграциясини таъминлаш кераклигини таъкидлади.

Бунинг учун метрополитенни бошқариш ҳамда «Тошшаҳартрансхизмат» акциядорлик жамиятининг буюртмачи ва назорат функциялари шаҳар транспорт бошқармасига ўтказилади. Молиялаштириш ҳам бошқарма томонидан амалга оширилиб, транспорт корхоналарига ҳақиқий бажарилган иш ҳажми, босиб ўтилган масофага қараб маблағ ажратилади.

«Тошшаҳартрансхизмат» жамиятини тўлиқ трансформация қилиш, Транспорт университети фаолиятини такомиллаштириш зарурлиги кўрсатиб ўтилди.

Эслатиб ўтамиз, Тошкент шаҳар транспорт бошқармаси бошлиғи Анвар Жўраев 2020 йилнинг август ойида ўтказилган брифингда яқин 3 ойда Тошкент шаҳрида жамоат транспорти йўналиш тармоғи оптималлаштирилишини маълум қилганди.

Маълумот учун, айни пайтда Тошкент метрополитени «Ўзбекистон темир йўллари» компанияси таркибига киради. Тошкент метрополитени унитар корхонаси бошлиғи бир вақтнинг ўзида «Ўзбекистон темир йўллари» АЖ раисининг ўринбосари ҳисобланади.