AQShda piyodalar ko‘prigidan o‘tishga uringan Nissan unga tiqilib qoldi

Amerikaning Kolorado shtatida istiqomat qiluvchi fuqaro uyiga qaytayotganida noodatiy “topilma”ga duch keldi. Daryo ustiga qurilgan ko‘prikka qora Nissan Rogue tiqilib qolgan, deb xabar beradi Motor.

Nissan Rogue qanday qilib ko‘prikka chiqib qolgani haligacha tushunarsiz. Shuningdek, krossover haydovchisining taqdiri nima kechgani ham noma’lum. Mahalliy aholining taxminicha, qora Nissan’ning egasi mast holda bo‘lgan va daryo ustidagi tor ko‘prikdan o‘tishga qaror qilgan. Avtomobilning o‘lchamlari to‘siqlar orasidan o‘ta olmasligini tushunib yetganida kech bo‘lgan. Shundan so‘ng, haydovchi mashinani tashlab, noma’lum tarafga qarab ketgan.

Mahalliy aholi sodir bo‘lgan holatda norozi, chunki daryo ko‘prigi — ularning ishga yetib olishi uchun yagona yo‘l. Ayni vaqtda tiqilib qolgan krossover evakuatsiya qilingan.

Eslatib o‘tamiz, sentabr oxirlarida Kaliforniyadagi poyga velotrassasiga tashlab ketilgan Jeep Wrangler evakuatsiya qilingan edi.