Andijon viloyati Baliqchi tumanida “Jiguli” haydovchisi ikki nafar yigitni o‘limiga sababchi bo‘ldi, deya xabar bermoqda YHXBB.
Ma’lum qilinishicha, 2020-yil 17-noyabr kuni soat 23:30 larda Baliqchi tumani “O‘rtaqo‘rg‘on” MFYdan o‘tuvchi 4K-112 Mirzaqo‘rg‘on–Baliqchi–Go‘ravon avtomobil yo‘lining 14-kilometrida yo‘l-transport hodisasi sodir bo‘ldi.
Unda haydovchi 1980-yilda tug‘ilgan Baliqchi tumani “Serquyosh” MFYda yashovchi Azamat Otaxonov o‘zining “VAZ-2106” rusumidagi avtomobilini boshqarib ketayotgan vaqtda yo‘lning qatnov qismida ketayotgan shu mahallada yashovchi 1998-yilda tug‘ilgan Abdulhay Mannopovni hamda uning do‘sti Qobuljon Umaralini orqa tomondan kelib urgan.
YTH oqibatida ikki jabrlanuvchi ham tan jarohati olib vafot etgan. Haydovchi voqea joyidan yashiringan.
Hodisa bo‘yicha viloyat IIB rahbariyati tumanidan to‘sib ushlash rejasi e’lon qilingan. Rejaga asosan viloyat IIB va tuman ichki ishlar xodimlari olib borgan surishtiruv ishlari natijasida YTH sodir qilgan haydovchi topilgan.
Holat bo‘yicha tuman IIB huzuridagi Tergov bo‘limi tomonidan Jinoyat kodeksining tegishli moddalariga asosan jinoyat ishi ochilgan.
Hodisa kelib chiqish sabablari o‘rganilganda YTH sodir bo‘lgan hudud tungi chiroqlar bilan jihozlanmagani aniqlangan. Mutasaddilar yaqin kunlarda ushbu qatnov qismi yoritish vositalari bilan jihozlanishini ma’lum qilgan.
Avvalroq Andijonda chiroqlari elektrdan qarzdorlik sabab o‘chirib qo‘yilgan qorong‘i trassadagi YTH oqibatida ikki kishi halok bo‘lgani, Namanganda talabga javob bermaydigan avtomobil yo‘lida sodir bo‘lgan YTH oqibatida piyoda vafot etgani hamda Samarqandda Damas urib ketishi natijasida velosipedchi voqea joyida halok bo‘lgani haqida xabar berilgandi.
Izoh (0)