Tuzatish (20-noyabr, soat 15:00): Ushbu xabarning tayyorlanishiga sabab bo‘lgan “yangi audio” aslida 2019-yilning iyun oyida tarqalgan ikki yarim soatlik eski audiodan kesib olingan parcha ekani ma’lum bo‘ldi. Axborot lozim darajada tekshirilmagani, eski ma’lumot e’tiborsizlik sabab yangilik sifatida takror berilgani uchun “Daryo” tahririyati mushtariylardan uzr so‘raydi.
“Bitta-ikkita sassiq, hammang har yoqdan kelgansan… Ayt senlar ham. Sharmandamisan, vijdoning bormi, oriyating bormi? Menga emas Andijon. Hey iflos, nima deyapsan sen Andijonni? Xohlasang, besh-oltitang avtobusga o‘tirgin-da, bor, o‘tib kel Farg‘onaga, Namanganga, tashkilotlariga bor. Nimadan qolib ketayotgan ekanman men Andijonda.
Alisher Usmonov degan hooov milliarder Namanganda tug‘ilgan ekan. 50 million dollar pul berar ekan. Namanganda mana shunaqa qilib tumanlarni obod qilar ekan. Andijonlik qaysi iflos menga bir so‘m pulini berib qo‘yyapti? Namanganda 50 million dollarga u nima qilyapti-yu, bir so‘m puli yo‘q Andijon nima qilyapti? Solishtirib ko‘r. Butun respublika keldi Namanganga. Hammasi kelishib tayyor pulni yeya olmayapti”, — degan Andijon viloyati hokimi.
Avvalroq, taxminan, 7-noyabrda internetda Shuhrat Abdurahmonov unga “sassiq gapirgan” marhamatlik uch ayolni 15 sutkaga qamatgani haqida gapirgan audio tarqalgandi. Viloyat hokimligi matbuot xizmati bu audioyozuv ikki yil avvalgi ekanini ta’kidlagan, biroq ijtimoiy tarmoq foydalanuvchilari hokimlikning bu bayonotini shubha ostiga olib, xususan, marhamatlik ayollarning noroziligi 2020-yil oktabr oyi oxirida yuz berganini ko‘rsatib o‘tgan edi.
Oliy Majlis Qonunchilik palatasi deputati Rasul Kusherbayev muhokamalarga sabab bo‘lgan mazkur audioyozuvga munosabat bildirarkan, bu gaplar qachon aytilgani ahamiyatsiz ekanini ta’kidlab, Andijon hokimini “Lenin boshlagan boshqaruvning sodiq vorisi” deb atagandi.
Keyinroq 14-noyabrda Shuhrat Abdurahmonovning ovozi yozilgan ikkinchi audio tarqaldi. Unda hokim O‘zbekiston Savdo-sanoat palatasi raisi Adham Ikromov ishtirok etgan yig‘ilishda viloyatda mavjud kamchiliklar haqida gapirmoqchi bo‘lgan andijonlik tadbirkorlarni “shakal” deb atagani ma’lum bo‘lgan edi.
Izoh (0)