“Barselona” qishki transfer oynasida 6 futbolchisini sotib yuboradi

“Barselona” qishki transfer oynasida bir qancha futbolchilarini sotib yubormoqchi.

Diario Sport’ning xabar qilishicha, gap olti nafar futbolchi haqida ketmoqda. Katalonlar Riki Puch va Karles Alenya kabi tarbiyalanuvchilari qatori, himoyachilar Samyuel Umtiti, Xunior Firpo, hujumchilar Mateus Fernandes va Martin Breytueytni sotuvga qo‘ymoqchi.

Hammadan ko‘ra Firpo ketishga yaqinroq. Unga “Inter” va “Napoli” kabi klublardan qiziqish bor. “Barselona” uning transferidan 20 million yevro ishlab olmoqchi.

Umtiti esa ijara asosida boshqa jamoaga yo‘l olishi mumkin. “Barselona” yozdayoq fransiyalik futbolchini transferga qo‘yishni istagandi. Hozirga kelib Umtiti o‘zini Ronald Kuman jamoasida ko‘rmayapti va takliflarni o‘rganib chiqishga tayyor. Unga “Roma” va “Lion”dan qiziqish bor.

Breytueyt ketishni istamayapti, biroq uning agentlari variantlar qidirmoqda. Katalonlar uning uchun sarflangan 18 million yevroni qoplay olmasligini tushunib turibdi. Biroq jamoa Depayga joy bo‘shatish uchun bu transferga majbur.

Mavzuga doir: “Barselona” sobiq direktori: “Barselona” 2017-yilda Mbappeni sotib olishi mumkin edi, biroq rahbariyat Dembele variantini tanlagan