«Милан» дарвозасига 3 та гол урган туркиялик 23 ёшли Юсуф Язижи Еврокубоклар тарихида ноёб натижа қайд этди

Европа Лигаси гуруҳ босқичи 3-туридан ўрин олган «Милан»—«Лилль» учрашуви меҳмонларнинг ғалабаси билан якунланди (0:3).

Ўйиндаги учала голга ҳам «Лилль»нинг туркиялик 23 ёшли ҳужумкор ярим ҳимоячиси Юсуф Язижи муаллифлик қилди.

Натижада Язижи «россонерилар» майдонида барча мусобақалар доирасида сўнгги 20 йил ичида ҳет-трикка эришган илк футболчи бўлди. Сўнгги бор «Сан-Сиро»да ҳет-трикка эришиш бахти бразилиялик Ривалдога насиб этганди. 2000 йил октябрида Чемпионлар Лигаси учрашуви доирасида Ривалдо «Барселона» сафида «Милан»га сафардаги баҳсда учта гол урганди. Ўйин эса 3:3 ҳисоби билан якунига етганди.

Қайд этиш жоиз, бу Юсуфнинг Европа Лигаси 2020/21 йилги мавсуми доирасидаги иккинчи ҳет-трикидир. Футболчи гуруҳ босқичи 1-тури доирасида сафарда Праганинг «Спарта»сига ҳам учта гол урганди. Натижада Язижи УЕФА байроғи остидан ўтаётган мусобақалар (Европа Лигаси, Чемпионлар Лигаси) доирасида бир мавсумнинг ўзида икки сафар ўйинида иккита ҳет-трикка эришган илк футболчи бўлди.

Маълумот учун, Юсуф Язижи 2019 йил августида «Трабзонспор» клубидан 17,5 миллион евро эвазига «Лилль»га ўтганди. У 2020/21 йилги мавсум француз жамоаси сафида барча мусобақалар доирасида 11 та ўйинда қатнашиб, 7 та гол урди.

Европа Лигаси H гуруҳида 3-турдан сўнг вазият эса қуйидагича кўриниш олди:

1. «Лилль» — 7 очко
2. «Милан» — 6 очко
3. «Спарта» — 3 очко
4. «Селтик» — 1 очко