Ўзбекистон Давлат солиқ қўмитаси томонидан Тошкент шаҳрида ўтказилаётган ютуқли чек ўйинлари 2020 йил 29 октябрдан бошлаб республиканинг барча ҳудудларини қамраб олади. Бу Президентнинг «Яширин иқтисодиётни қисқартириш ва солиқ органлари фаолияти самарадорлигини ошириш бўйича ташкилий чора-тадбирлар тўғрисида»ги фармонида белгилаб қўйилган, деб хабар бермоқда Давлат солиқ қўмитаси.
Ҳужжатга мувофиқ, Давлат солиқ қўмитаси томонидан 2020 йилда Тошкент шаҳрида синов тариқасида жорий этилган ютуқли чек ўйинларининг муваффақияти сабаб ушбу акция кўлами янада кенгаяди.
Энди истеъмолчилар ютуқли чек ўйинларининг навбатдаги бешинчи тиражида иштирок этиш учун республиканинг исталган ҳудудида онлайн назорат касса машиналари ёки виртуал касса чекини олиб рўйхатдан ўтказиши мумкин.
Асосий шарт — ҳар бир истеъмолчи битта савдо шохобчасидан бир кунда фақат иккита, харид миқдори 1000 (минг) сўмдан кам бўлмаган чекни рўйхатдан ўтказиши мумкин.
Ютуқли чек ўйинларида иштирок этиш учун харид қилинган маҳсулот (хизмат) учун онлайн НКМ ёки виртуал кассанинг QR кодли чекини олиш лозим.
Бундай қурилмалар барча дорихоналар, автомобилларга ёқилғи қуйиш шохобчалари, алкогол ва тамаки маҳсулотлари савдоси билан шуғулланувчи дўконлар, шунингдек, йирик савдо тармоқларида ўрнатилган. Ҳозирда республикада қарийб 64 минг савдо шохобчасида бундай қурилмалар мавжуд.
Кейинги қадам — чекнинг QR кодини Soliq мобил иловасида сканерлаш ёки 12 хонали фискал белгисини 1077 рақамига SMS тарзда юбориш лозим. Рўйхатдан ўтказиш муваффақиятли якунлангандан сўнг, чекни рўйхатдан ўтказган киши ютуқли ўйин иштирокчисига айланади.
Қўмита томонидан маълум қилинишича, Тошкент шаҳрида ўтказилган ютуқли чек ўйинларининг ҳар бир тиражида иштирокчилар сони тобора ортиб борди. Ҳозиргача ўтказилган 4 та тиражда онлайн НКМ ва виртуал кассалардан берилган қарийб 110 минг дона чек иштирок этди. Ушбу чекларнинг умумий харид миқдори 52 миллиард сўмдан зиёдни ташкил этади.
Айни вақтга қадар бешинчи тиражда иштирок этиш учун 30 мингдан ортиқ чек рўйхатдан ўтказилди. Ушбу тиражда 2020 йил 13 октябрь соат 12:00 дан бошлаб берилган ва рўйхатдан ўтказилган чеклар иштирок этади. Ўйин ўтказилиш санаси қўшимча равишда Давлат солиқ қўмитаси расмий манбалари орқали маълум қилинади.
Эслатиб ўтамиз, Давлат солиқ қўмитаси 2020 йилнинг 22 июль куни савдо чеклари асосида ўтказиладиган ютуқли ўйиннинг биринчи тиражини ўтказганди.
Ўзбекистонда тадбиркорлик субъектлари ва савдо шохобчаларида онлайн-назорат кассалари ва виртуал кассалар жорий қилинмоқда. Аҳолининг харидлар учун чек талаб қилиши ва мазкур кассалардан фойдаланишни кўпайтириш мақсадида савдо чеклари асосида ўтказиладиган чек лотереяси жорий қилинди.
Изоҳ (0)