“Daryo”da Qarshi shahri yetti kundan buyon suvsiz qolayotgani, savdo do‘konlaridagi ichimlik suvining narxi 1000 so‘mga chiqqani haqida xabar berilgandi. Viloyat uy-joy kommunal xizmat ko‘rsatish boshqarmasi axborot xizmatining “Daryo”ga ma’lumot berishicha, maqoladan so‘ng 28-oktabr kuni kechki paytdan boshlab aholiga ichimlik suvi berila boshlangan.
“2020-yil 27-oktabr kuni Qarshi shahri aholisining suv ta’minoti qayta tiklandi va 28-oktabr kuni kechki paytdan boshlab shahar aholisiga tizimli ravishda ichimlik suvi yetkazib berilmoqda”, — deyiladi mas’ullar axborotida.
Ta’kidlanishicha,“Qashqadaryo suv ta’minoti” MChJ tomonidan markaziy suv quvurlari o‘chirilgach yangi suv quvuriga gidravlik bosim ostida sinov o‘tkazilgan. Sinov davrida nosozlik borligi aniqlanib, aniqlangan nosozlik shu kunning o‘zida bartaraf etilgan va yangi markaziy suv quvuri foydalanishga topshirilgan.
“Qashqadaryo suv ta’minoti” MChJ axborot xizmatining yozishicha, Shahrisabz—Qarshi bosh suv quvurining Yakkabog‘ tumani Xo‘jailg‘or qishlog‘i yaqinidan o‘tgan 95 metr yaroqsiz qismi ta’mirlanishi munosabati bilan 2020-yilning 21-oktabr kuni soat 17:00 dan boshlab 23-oktabr kuni soat 09:00 gacha Qarshi shahriga suv yetkazib berilishi to‘liq to‘xtatilishi ma’lum qilingan. Biroq sinov davridagi nosozlik sabab aytilgan muddat cho‘zilgan.
“Qarshi shahriga suv yetkazib berayotgan markaziy suv quvurlaridan uzoq yillardan buyon foydalanilib kelinayotganligi sababli suv quvurlarida tez-tez nosozliklar ro‘y bergan. Shu holat inobatga olinib, Qarshi shahridagi markaziy suv quvurlari bosqichma-bosqich yangilanib borilmoqda. O‘zbekiston Respublikasi Prezidentining 2020-yil 19-martdagi farmoniga asosan Qarshi shahrining Paxtazor hamda 4, 5, 6, 7-mittitumanlari ichimlik suv tarmog‘ini rekonstruksiya qilish rejalashtirilgan. Shunga ko‘ra, “Suv ta’minoti va oqova suv obyektlari qurilishi bo‘yicha injiniring kompaniyasi” DUK Qashqadaryo viloyat hududiy boshqarmasi buyurtmachiligida Qarshi shahridagi Islom Karimov ko‘chasining viloyat Ko‘z kasalliklari shifoxonasidan Nasaf ko‘chasi kesishmasiga qadar bo‘lgan joyida pudratchi ‘1 son kompleks loyiha qurilish’ xususiy korxonasi tomonidan diametri 800 mm.li ichimlik suv quvurini rekonstruksiya qilish ishlari amalga oshirilgan”, — deyiladi mas’ul tashkilot axborotida.
Eslatib o‘tamiz, Qarshi shahri aholisini 24 soat davomida ichimlik suvi bilan ta’minlash maqsadida inqirozga qarshi kurashish jamg‘armasidan 16,5 milliard so‘m mablag‘ ajratilgan bo‘lib, suv quvurlarini yangilash ishlari “1-son kompleks loyiha qurilish va montaj” xususiy korxonasi tomonidan bajarilmoqda.
Izoh (0)