AOKAda tashkil qilingan brifingda Koronavirusga qarshi kurash shtabi a’zosi Barno Odilova aholidan tushayotgan savollarga javob qaytardi.

Foto: “Daryo”

Mutaxassis koronavirusga qarshi vaksina sinovlarida ko‘ngilli sifatida kimlar qatnashishi mumkinligiga oydinlik kiritgan.

“Har bir mamlakatda yangi dori-darmonlar ishlab chiqarilganidan keyin u bir necha bosqichlarda sinovlardan o‘tkaziladi, jumladan, vaksinalar ham. Sinovda qatnashish uchun ko‘ngillilar o‘z xohishlariga ko‘ra tanlab olinadi. Koronavirus kasalligiga qarshi vaksinani sinovdan o‘tkazishda ushbu kasallikka chalinmagan va organizmida immunoglobulin G shakllanmagan ko‘ngillilar qatnashishi mumkin”, – degan Barno Odilova.

Shuningdek, SSV shtabi a’zosi dokadan tikilgan niqob COVID-19 koronavirus infeksiyasining yuqish xavfini kamaytirishi uchun necha qavat bo‘lishi kerakligi borasidagi savolga ham javob bergan.

“Dokadan tikilgan niqob 6-8 qavatgacha bo‘lishi kerak va uni har 3 soatda almashtirish, ishlatilganidan keyin yuvib-dazmollab qayta foydalanish mumkin”, – deya javob bergan u.

Eslatib o‘tamiz, Innovatsion rivojlanish vazirligi Xitoy Fanlar akademiyasi bilan Anhui ZhifeiLongcom Biopharmaceutical tomonidan ishlab chiqarilgan vaksinaning uchinchi bosqich klinik sinovlarini O‘zbekistonda o‘tkazilishini ma’lum qilgan. Unga ko‘ra, sinov 18 va undan katta yoshdagi ko‘ngillilarda o‘tkaziladi va sinov boshlanishidan oldin Xitoy vakillari emlash shartlarini tushuntirish uchun bir nechta treninglar tashkillashtiradi. Keyinchalik Xitoyning koronavirusga qarshi vaksinasi sinovlarida qatnashadigan o‘zbekistonlik ko‘ngillilarga pul to‘lanishi mumkinligi haqida xabar berilgan.