Turkiya g‘arbida yuz bergan 6,6 magnitudali zilzilada halok bo‘lganlar va jarohat olganlar orasida O‘zbekiston fuqarolari yo‘q. Bu haqda O‘zbekiston Tashqi ishlar vazirligi Konsullik-huquqiy departamenti xabar berdi.
O‘zbekistonning Istanbul shahridagi bosh konsulxonasi ma’lumotiga ko‘ra, Toshkent vaqti bilan soat 19:30 holatiga Turkiyaning g‘arbiy qismida 2020-yil 30-oktabrda sodir bo‘lgan kuchli zilzila natijasida halok bo‘lgan va jarohat olganlar orasida O‘zbekiston fuqarolari qayd etilmagan.
Vazirlik xabariga ko‘ra, O‘zbekistonning Anqara shahridagi elchixonasi va Istanbul shahridagi bosh konsulxonasi Izmir viloyatining tezkor shtabi bilan doimiy aloqa o‘rnatgan.
“Jarohat olgan hamyurtlarimiz to‘g‘risida ma’lumot aniqlanganda zarur yordam ko‘rsatish uchun O‘zbekistonning Istanbul shahridagi bosh konsulxonasiga murojaat qilshingizni so‘raymiz (Telefon: +90 212-323-20-36/37)”, — deyiladi vazirlik xabarida.
Eslatib o‘tamiz, Turkiya g‘arbida 6,6 magnitudali zilzila yuz berdi, epimarkaz Izmir viloyatining Seferlixisar shahri atrofida, zilzila o‘chog‘i esa 16,5 kilometr chuqurlikda joylashgan. So‘nggi ma’lumotlarga ko‘ra, zilzila oqibatida kamida olti kishi halok bo‘lgan, 202 kishi jarohat olgan.
Izoh (0)