Foto: Shifokorlarga atalgan Sergelidagi graffiti

Toshkentning Sergeli tumanida koronavirusga qarshi kurashayotgan shifokorlar sharafiga ilk muralni yaratilish jarayoni yakunlandi. Asar Yangi Sergeli va Lutfkor ko‘chalari kesishmasida paydo bo‘lgan. Bu haqda “Ziyo forum” ilm-fan va ta’lim-tarbiyani rivojlantirish xalqaro fondi “Daryo”ga ma’lum qildi.

Mural-art bu – zamonaviy ko‘cha san’ati bo‘lib, bunda polotno vazifasini ko‘p qavatli bino devorlari bajaradi.

“Menimcha, bu asar pandemiya qurbonlari uchun o‘ziga xos yodgorlik va ular xotirasi uchun hurmat belgisi bo‘ldi. Yaratilgan obraz – fuqarolar e’tiborini yana bir bor shifokorlarimiz mardligi va jasoratiga qaratish uchun imkoniyat”, – deydi Sergeli tumani hokimi Elbek Shukurov.

Muralning yaratilishida shahar ma’muriyati ish joyi va transport bilan ta’minlagan. Natijada bir necha kun ichida ko‘p qavatli bino devorida XXI asrning dolzarb kasalligidan bolani himoya qilayotgan shifokor qiz siymosi paydo bo‘lgan.

“Ushbu asar orqali virusga qarshi birinchi qatorlarda kurashayotgan va o‘zlarining professionalligini namoyish etib, insonlar hayotini qutqarayotgan shifokorlarga minnatdorlik hissini yetkazmoqchi edim. Umid qilamanki, bizning ijodiy xabarimiz shifokorlarimiz va shahar aholisiga xush keladi”, – deydi loyiha muallifi, rassom Hasan Maycheyev.

Ushbu loyiha yangi madaniy burilish bo‘lib, barchaning ko‘z o‘ngida iste’dodli rassomlar tomonidan amalga oshiriladi. “Ziyo forum” ilm-fan va ta’lim-tarbiyani rivojlantirish xalqaro fondi direktori hamda loyiha rahbari Bobur Farmonovning so‘zlariga ko‘ra, asar uchun joy tasodifan tanlanmagan.

“Mural ko‘rinmas dushmanga qarshi kurashayotgan shifokorlar qahramonligining ramziga aylandi. Ta’kidlash joizki, ushbu joy tasodifan tanlanmagan, ko‘p qavatli uydan uzoq bo‘lmagan masofada koronavirusga chalingan bemorlarni taqsimlash markazi mavjud. Ko‘pgina shifokorlar ikki oy yoki undan ortiq muddat davomida uyda emaslar va biz ushbu ijodiy xabar orqali ularga o‘z minnatdorchiligimizni bildirmoqchimiz. Bu loyiha fond va Sergeli tumani hokimi Elbek Shukurovning qo‘shma pilot loyihasidir”.

Eslatib o‘tamiz, iyul oxirlarida Toshkentda “Yuksalish” umummilliy harakati tashabbusi bilan Humo Arena fasadida “O‘zbekiston shifokorlariga rahmat” mavzusida fleshmob o‘tkazilgandi.