O‘zbekiston Musulmonlari idorasi huzuridagi Haj-umra markazi yangi umra mavsumi 2025-yil avgust oyidan boshlanishini e’lon qildi.
So‘nggi yillarda umra safarlarini yuqori saviyada tashkil etish, ziyoratchilarga sifatli va qulay xizmatlar ko‘rsatish hamda ibodatlarni shariat talablariga muvofiq ado etish ishlari Haj-umra markazi tomonidan amalga oshirib kelinmoqda. 30 yildan ortiq amaliy tajriba asosida ziyoratchilar uchun 10 kunlik maxsus umra dasturi taklif etilmoqda.
Dastur doirasida quyidagi qulayliklar nazarda tutilgan:
- Uzbekistan Airways’ning Toshkent–Jidda–Toshkent yo‘nalishida to‘g‘ridan to‘g‘ri parvozlar;
- 3 kecha Madina, 7 kecha Makkada bo‘lish;
- Jidda–Madina, Madina–Makka va Makka–Jidda yo‘nalishlarida zamonaviy avtobuslar xizmati;
- Makka va Madina shaharlarida barcha sharoitlarga ega mehmonxonalar;
- 3 mahal ovqatlanish;
- Madina shahrida Nabaviy masjidi, Ravza, Qubo, Qiblatayn masjidlari va Uhud maydoniga ziyorat;
- Makka shahrida Arafot, Mino, Muzdalifa vodiylari hamda Nur va Savr tog‘lariga ziyorat;
- Jidda shahridagi Qizil dengizga sayohat.
Qayd etilishicha, umra safari davomida ziyoratchilarga tajribali ishchi guruhi, taniqli imom-xatiblardan iborat guruh rahbarlari, malakali shifokorlar hamrohlik qilib, ibodat va safarning oson va xotirjam o‘tishini ta’minlaydi.
Umra tadbirlarini tashkil etish
2024-yil iyulida O‘zbekistonda umra tadbirlarini tashkil etish va o‘tkazish litsenziyalanadigan faoliyatning alohida turi sifatida belgilandi. Hukumat qarori bilan litsenziya talab va shartlari joriy etilgan. Litsenziyaga ega bo‘lmagan tadbirkorlik subyektlari tomonidan umra xizmatlarini ko‘rsatganlik uchun yuridik shaxslarga solinadigan jarimalar miqdorlari BHMning 200 baravari etib belgilangan.
2024-yilda umra mavsumi 10-sentyabrdan boshlangandi.
Izoh (0)