Rossiya Transport vazirligi 14-iyul kuni Moskva va Pxenyan o‘rtasida ilk bor 27-iyuldan boshlab to‘g‘ridan to‘g‘ri parvozlar amalga oshirilishini ma’lum qildi. Bu haqda Anadolu xabar berdi.
Nordwind Airlines aviakompaniyasi har oyda bitta reysni amalga oshiradi, parvoz vaqti esa taxminan 8 soatni tashkil etadi. Qaror “Rosaviatsiya” tomonidan ikki davlat o‘rtasida muntazam aviaqatnovlarni amalga oshirish ma’qullanganidan so‘ng qabul qilingan.
“Birinchi marta Rossiya va KXDR poytaxtlari o‘rtasida to‘g‘ridan to‘g‘ri reyslar yo‘lga qo‘yiladi”, deyiladi vazirlik bayonotida.
O‘tgan hafta Shimoliy Koreyaning sharqiy sohilidagi Vonsan shahriga tashrif buyurgan Rossiya tashqi ishlar vaziri Sergey Lavrov mamlakatlar o‘rtasidagi dengiz transporti yo‘nalishlarini tiklash rejalashtirilayotganini aytgan.
Rossiya TIV rasmiy vakili Mariya Zaxarovaning aytishicha, Moskva va Pxenyan iyun oyida temiryo‘l qatnovlarini tiklagan edi. Endilikda esa havo aloqalarini kengaytirish ustida ish olib borilmoqda. Aprel oyida Tumen daryosi orqali mamlakat chegaralarini bog‘laydigan ko‘prik qurilishi ham boshlangandi.
Hozirgacha ikki mamlakat faqat Pxenyan va Vladivostok o‘rtasida to‘g‘ridan to‘g‘ri reyslarni amalga oshirardi.
Izoh (0)