Ispaniyada so‘nggi bir sutka ichida 20 986 kishida koronavirus aniqlanib, yangi antirekord qayd etildi va mamlakatda kasallanganlarning umumiy soni 1 026 281 kishiga yetdi. Bu haqda “Korrespondent.net” xabar berdi.
Ispaniyada koronavirus asoratlaridan 34 521 kishi vafot etgan. Mamlakat hukumati raisi Pedro Sanchesning ma’lum qilishicha, kasallanish holatlarining hammasi ham aniqlanmayotgani sababli ayni paytda kasallanganlar soni 3 milliondan ortiq bo‘lishi mumkin.
Uning so‘zlariga ko‘ra, pandemiya bilan kurashish uchun ko‘proq ish qilish kerak. Biroq u yangi choralar haqida ma’lum qilmagan, faqat fuqarolarni mas’uliyat bilan harakat qilishga chaqirgan.
“Agar choralarga amal qilmasak, eng ko‘p yaxshi ko‘radigan kishilarimizning hayotini xavf ostiga qo‘yamiz. Nima qilishimiz kerak - harakatni va ijtimoiy aloqalarni kamaytirish. Boshqa yechim yo‘q”, — deya ispaniyaliklarga murojaat qilgan bosh vazir.
Avvalroq Ispaniya koronavirusga chalinganlar soni 1 mln kishidan oshgan Yevropa Ittifoqidagi birinchi mamlakat bo‘lgani haqida xabar berilgandi.
Izoh (0)