“Soyuz MS-16” kosmik kemasining boshqariluvchi apparati Xalqaro kosmik stansiyaning (XSK) uch nafar a’zosi bilan Qozog‘istonga qo‘ndi. XKSdan yerga rossiyalik kosmonavtlar Anatoliy Ivanishin va Ivan Vagner, shuningdek, NASA astronavti Kristofer Kessidi qaytgan. Bu haqda “Roskosmos” xabar berdi.
“Soyuz MS-16” Xalqaro kosmik stansiyadan Moskva vaqti bilan soat 02:32 da ajralgan. Soat 05:54 da kosmonavtlar Yerga muvaffaqiyatli qo‘nishni amalga oshirgan. “Roskosmos”ning ma’lum qilishicha, Yer atrofi orbitasidan tushish va qo‘ndirish operatsiyalari rejadagidek o‘tgan.
Ivanishin va Vagner 22-oktabr kuni Moskva viloyatidagi Chkalov aerodromiga yetkaziladi. Keyingi bir necha hafta davomida ular Yulduzlar shaharchasida shifokorlar nazorati ostida bo‘lib, kosmonavtlarning parvozdan keyingi reabilitatsiya jarayonlarini o‘tkazadi.
Ivanishin, Vagner va Kessidining ekspeditsiyasi qariyb 196 kun davom etgan. Bu vaqt ichida ekipaj o‘nlab, jumladan, tibbiyot, kosmik biologiya va fizika-texnika jarayonlariga oid tajribalarni o‘tkazgan.
Hozirda XKS bortida 64-uzoq ekspeditsiya jamoasi — Sergey Rijikov, Sergey Kud-Sverchkov va NASA astronavti Ketlin Rubins ish olib bormoqda. Ular stansiyaga 14-oktabr kuni yetib borgan.
Eslatib o‘tamiz, Ilon Maskning SpaceX kompaniyasi tomonidan yaratilgan Crew Dragon kosmik kemasi 30-may kuni Xalqaro kosmik stansiya tomon uchirilgan edi. 31-may kuni esa Crew Dragon XKSga muvaffaqiyatli tutashgan va 3-avgust kuni Yerga muvaffaqiyatli qo‘ngandi.
Izoh (0)