Boyqo‘ng‘irdan “Soyuz MS-17” uchirildi. U ilk bor kosmonavtlarni Xalqaro kosmik stansiyaga uch soatda yetkazib boradi

Boyqo‘ng‘ir kosmodromidan “Soyuz MS-17” kemasi boshqaruvidagi “Soyuz-2.1a” raketa tashuvchisi muvaffaqiyatli parvozni amalga oshirdi.

Moskva vaqti bilan soat 8:45 da amalga oshirilgan start “Roskosmos”ning YouTube’dagi kanali orqali to‘g‘ridan to‘g‘ri translyatsiya qilindi. Soat 8:53 da “Soyuz MS-17” raketa tashuvchining uchinchi bo‘g‘inidan ajralgan va maqsadli orbitaga chiqqan.

“Soyuz” bortida Xalqaro kosmik stansiyaning yangi ekipaji bor — rossiyalik kosmonavtlar Sergey Rijkov va Sergey Kud-Sverchkov, shuningdek, NASA astronavti Ketlin Rubins.

“Soyuz MS-17” parvozi birinchi bor o‘ta qisqa sxema bo‘yicha amalga oshirilmoqda va uch soatdan biroz ko‘proq vaqtni oladi — XKS bilan kemaning ulanishi soat 11:52 ga rejalashtirilgan. Odatda Xalqaro kosmik stansiyaga parvozlar uchun olti soatga yaqin vaqt ketadi.

Rejaga ko‘ra, yangi ekipaj XKSda 177 sutka bo‘ladi. Bu vaqt ichida rossiyalik kosmonavtlar ikki marotaba ochiq kosmosga chiqadi.

Eslatib o‘tamiz, Ilon Maskning SpaceX kompaniyasi tomonidan yaratilgan Crew Dragon kosmik kemasi 30-may kuni Xalqaro kosmik stansiya tomon uchirilgan edi. 31-may kuni esa Crew Dragon XKSga muvaffaqiyatli tutashgan. Bortida ikki astronavt — Duglas Xyorli va Robert Benken bo‘lgan Crew Dragon kemasi Yerga qaytish uchun 2-avgust kuni avtomatik ravishda Xalqaro kosmik stansiya (XKS)dan ajralgandi.