Bir qator top-klublar Yevropa Premyer Ligasi musobaqasini tashkil qilish borasida muzokaralar o‘tkazmoqda.
Sky Sports’ning xabar qilishicha, bu loyiha “Liverpul” va “Manchester Yunayted” klublari tomonidan ilgari surilgan.
Musobaqani FIFA bayrog‘i ostida 2022-yildayoq boshlash rejalashtirilgan. Taxminlarga ko‘ra, unda 18 ta jamoa ishtirok etadi.
Angliya, Fransiya, Germaniya, Ispaniya va Italiyaning o‘nga yaqin klubiga ishtirok etish masalasida so‘rov yuborilgan. Ular qatorida “Barselona”, “Real”, “Atletiko”, “Bavariya”, PSJ va “Yuventus” kabi jamoalar bor.
Loyihada Angliyaning bir yo‘la besh klubi ishtirok etishi mumkin. Ta’kidlanishicha, bu masala “Manchester Siti”, “Tottenhem”, “Chelsi” va “Arsenal” jamoalari bilan muhokama qilingan.
Ayni damda investorlarni jalb qilish masalasi ko‘rib chiqilmoqda. JP Morgan banki homiyga aylanishi mumkin. Yevropa Premyer Ligasini yaratish uchun olti milliard yevro talab etiladi.
FIFA va UEFA mazkur ma’lumotlarni sharhlashdan bosh tortgan.
Avvalroq “Liverpul” va “Manchester Yunayted” Angliya futboliga yangiliklar olib kirish borasida yangi loyihaga yo‘l urgani. Unga ko‘ra, APL klublari sonini qisqartirish, Angliya Liga Kubogi va mamlakat Superkubogi musobaqalaridan voz kechish kabi takliflar bildirilgandi. Biroq liga mazkur loyiha amalga oshmasligini ma’lum qilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)