O‘zjan Deniz nafaqat aktyor, balki kompozitor, xonanda va rejissor sifatida ham faoliyat olib boradigan san’at vakillaridan. Muxlislari bir talay bo‘lgan mazkur aktyorni Turkiyada juda ham yaxshi ko‘rishadi va uni amerikalik aktyor Jorj Kluniga o‘xshatishadi.
Aktyor arsenalida bugungi kunda 26 tadan ortiq TV-loyihalarni uchratish mumkin. Turli janrlarni mahorat bilan ijro qila olishini ko‘rsata olgan O‘zjan bir qancha mamlakatlarda e’tiroflarga sazovor bo‘lgan. Quyida aktyor faoliyatidagi eng yaxshi ijod namunalari haqida ma’lumot berib o‘tamiz.
“Istanbullik kelin”
Mashhur kitob asosida suratga olingan va syujeti badavlat biznesman Farux va oddiy oilaning farzandi Surayyo o‘rtasidagi munosabatlar tashkil qilgan serialning ilk qismi 2017-yilda efir yuzini ko‘rgan. Unda O‘zjan aktrisa Asli Enver bilan birga juftlik rolini gavdalantirgan. Uch fasldan iborat serial uch yil davomida yuqori reytingni qayd etgan. “Istanbullik kelin”ning o‘ziga xosligi shundaki, ijodkorlar unda faqat sevgi emas, rishtalar va oila muqaddasligini tomoshabinga voqealar rivoji orqali yetkazib berishga harakat qilishgan.
“Qora gul”
4 fasldan iborat mazkur serial 2013-yildan 2016-yilgacha efirga uzatilgan. “Qora gul” klassik turk dramasi hisoblanadi va unda Turkiya qishloqlaridan biridagi katta oila hayoti va munosabatlari aks ettirilgan. 125 qism davomida fitnalar, fosh etish va tan olish kabi holatlar kuzatiladi.
“Iyun oqshomi”
“Iyun oqshomi” aktyor ijrosidagi eng mashhur seriallardan biri hisoblanadi. Unda endigina katta hayotga qadam qo‘yishni boshlagan va o‘zidan katta, kelishgan erkak bilan tanishgan talaba qiz, ular o‘rtasidagi samimiy sevgi paydo bo‘lishi va turli qiyinchiliklarga duch kelishini ko‘rish mumkin. Shuningdek, ushbu serialda “Muhtasham yuz yil”da sulton Sulaymonning volidasi rolini ijro qilgan Nebahat Chexre ham suratga tushgan.
“Taqdirim yozilgan kun”
O‘zjan Deniz serialda Xadicha Shendil va Begyum Kutyuk bilan birgalikda suratga tushgan. “Taqdirim yozilgan kun” farzandsizligi sabab surrogat ona yordamida ota-ona bo‘lishni istagan, ammo ushbu qaror hayotini ostin-ustun qilib yuborgan badavlat juftlik haqidagi drama hisoblanadi.
Izoh (0)