Ўзжан Дениз нафақат актёр, балки композитор, хонанда ва режиссёр сифатида ҳам фаолият олиб борадиган санъат вакилларидан. Мухлислари бир талай бўлган мазкур актёрни Туркияда жуда ҳам яхши кўришади ва уни америкалик актёр Жорж Клунига ўхшатишади.
Актёр арсеналида бугунги кунда 26 тадан ортиқ ТВ-лойиҳаларни учратиш мумкин. Турли жанрларни маҳорат билан ижро қила олишини кўрсата олган Ўзжан бир қанча мамлакатларда эътирофларга сазовор бўлган. Қуйида актёр фаолиятидаги энг яхши ижод намуналари ҳақида маълумот бериб ўтамиз.
«Истанбуллик келин»
Машҳур китоб асосида суратга олинган ва сюжети бадавлат бизнесман Фарух ва оддий оиланинг фарзанди Сурайё ўртасидаги муносабатлар ташкил қилган сериалнинг илк қисми 2017 йилда эфир юзини кўрган. Унда Ўзжан актриса Асли Энвер билан бирга жуфтлик ролини гавдалантирган. Уч фаслдан иборат сериал уч йил давомида юқори рейтингни қайд этган. «Истанбуллик келин»нинг ўзига хослиги шундаки, ижодкорлар унда фақат севги эмас, ришталар ва оила муқаддаслигини томошабинга воқеалар ривожи орқали етказиб беришга ҳаракат қилишган.
«Қора гул»
4 фаслдан иборат мазкур сериал 2013 йилдан 2016 йилгача эфирга узатилган. «Қора гул» классик турк драмаси ҳисобланади ва унда Туркия қишлоқларидан биридаги катта оила ҳаёти ва муносабатлари акс эттирилган. 125 қисм давомида фитналар, фош этиш ва тан олиш каби ҳолатлар кузатилади.
«Июнь оқшоми»
«Июнь оқшоми» актёр ижросидаги энг машҳур сериаллардан бири ҳисобланади. Унда эндигина катта ҳаётга қадам қўйишни бошлаган ва ўзидан катта, келишган эркак билан танишган талаба қиз, улар ўртасидаги самимий севги пайдо бўлиши ва турли қийинчиликларга дуч келишини кўриш мумкин. Шунингдек, ушбу сериалда «Муҳташам юз йил»да султон Сулаймоннинг волидаси ролини ижро қилган Небаҳат Чехре ҳам суратга тушган.
«Тақдирим ёзилган кун»
Ўзжан Дениз сериалда Хадича Шендил ва Бегюм Кутюк билан биргаликда суратга тушган. «Тақдирим ёзилган кун» фарзандсизлиги сабаб суррогат она ёрдамида ота-она бўлишни истаган, аммо ушбу қарор ҳаётини остин-устун қилиб юборган бадавлат жуфтлик ҳақидаги драма ҳисобланади.
Изоҳ (0)