SSV: Koronavirusga chalingan bemorlarni davo standartlariga rioya qilmasdan davolagan 4 ta xususiy klinikaning litsenziyasi bekor qilindi

Sog‘liqni saqlash vazirligi COVID-19 koronavirus infeksiyasiga chalingan bemorlarni noto‘g‘ri davolagan xususiy shifoxonalarning ayrimlariga berilgan litsenziyalar bekor qilingani haqida xabar berdi.

“2020-yil 26-martdagi “O‘zbekiston Respublikasida koronavirus infeksiyasi keng tarqalishining oldini olishga doir qo‘shimcha chora-tadbirlar to‘g‘risida” Prezident qarori bilan xususiy shifoxonalarga koronavirus infeksiyasini davolashga ruxsat berilgan edi.

Tibbiy faoliyatni litsenziyalash tartibi to‘g‘risidagi nizomda ham nodavlat tibbiyot muassasalari Sog‘liqni saqlash vazirligi tomonidan tasdiqlangan diagnostika va davolash standartlariga, sanitariya-epidemiologiya qoidalariga qat’iy rioya qilishi lozimligi alohida ta’kidlangan.

Ayrim xususiy shifoxonalarda koronavirusga chalingan bemorlarni davolashda tasdiqlangan standartlarga rioya qilmaslik oqibatida jiddiy va qaltis xatolarga yo‘l qo‘yilgan.

Misol uchun, koronavirusni davolash bilan shug‘ullanayotgan xususiy shifoxonalar faoliyati yuzasidan retro-prospektiv tekshiruvlar o‘tkazilganda oliy toifali pulmonolog Z.Yu. tomonidan bir oilaning 3 a’zosiga, ahvoli yengil darajada bo‘lishiga qaramasdan, 12 turdagi dori vositasini (“Askorbin” kislota, “Baktazon”, “Moksiv”, “Deksametazon”, “Vobenzim”, “Trombonet”, “Kurantil”, “Laritidin”, “Flyukonazol”, “Ambroksol”, “Sink”, “Veroshpiron”) tavsiya qilingani qayd etildi.

Shuningdek, boshqa bir xususiy shifoxonada faoliyat yuritgan otorinolaringologiya ixtisosligi bo‘yicha 2-kurs klinik ordinatori I.B. ayrim bemorlarga, ular kasallikning yengil darajasini o‘tkazayotganiga qaramasdan, bir vaqtning o‘zida 10 ga yaqin (“Sefepim”, “Atsiklovir”, “Deksametazon”, “Ambroksol”, “Kleksan”, “Kurantil”, “Kardiomagnil”, “Veroshpiron”) dori vositalarini hamda ingalyatsiya uchun “Dekosan”+“Deksametazon”+“Dimedrol” dori vositalari aralashmalarini tavsiya qilgan.

Ikkala holatda ham bemorlarning ahvoli yomonlashganligi sababli ular Respublika virusologiya ilmiy tekshirish instituti klinikasiga yotqizilgan.

Shuningdek, so‘nggi bir yarim oy mobaynida xususiy shifoxonalardan birgina Respublika shoshilinch tibbiy yordam ilmiy markaziga jami 17 nafar bemor belgilangan davo standartlariga amal qilinmagani, me’yoridan ortiq miqdorda antibiotik va boshqa tavsiya etilmagan turli xil infuzion dori vositalari qo‘llanilgani uchun og‘ir ahvolda ko‘chirilgani ma’lum bo‘lgan. Bu kabi bemorlar Zangiota tumanidagi yuqumli kasalliklar shifoxonalari va vazirlik tasarrufidagi boshqa davolash muassasalariga ham yotqizilgan.

Sog‘liqni saqlash vazirligi tomonidan Toshkent shahrida o‘tkazilgan tekshiruv natijalari bo‘yicha 4 ta xususiy shifoxonaga berilgan litsenziya tugatildi, 2 tasida litsenziyaning amal qilish muddati 10 kunga to‘xtatildi, yana 2 tasiga esa kamchiliklarni bartaraf etish bo‘yicha bajarilishi majburiy bo‘lgan ko‘rsatmalar berildi”, – deyiladi vazirlik axborot xizmatining xabarida.