ССВ: Коронавирусга чалинган беморларни даво стандартларига риоя қилмасдан даволаган 4 та хусусий клиниканинг лицензияси бекор қилинди

Соғлиқни сақлаш вазирлиги COVID-19 коронавирус инфекциясига чалинган беморларни нотўғри даволаган хусусий шифохоналарнинг айримларига берилган лицензиялар бекор қилингани ҳақида хабар берди.

«2020 йил 26 мартдаги «Ўзбекистон Республикасида коронавирус инфекцияси кенг тарқалишининг олдини олишга доир қўшимча чора-тадбирлар тўғрисида» Президент қарори билан хусусий шифохоналарга коронавирус инфекциясини даволашга рухсат берилган эди.

Тиббий фаолиятни лицензиялаш тартиби тўғрисидаги низомда ҳам нодавлат тиббиёт муассасалари Соғлиқни сақлаш вазирлиги томонидан тасдиқланган диагностика ва даволаш стандартларига, санитария-эпидемиология қоидаларига қатъий риоя қилиши лозимлиги алоҳида таъкидланган.

Айрим хусусий шифохоналарда коронавирусга чалинган беморларни даволашда тасдиқланган стандартларга риоя қилмаслик оқибатида жиддий ва қалтис хатоларга йўл қўйилган.

Мисол учун, коронавирусни даволаш билан шуғулланаётган хусусий шифохоналар фаолияти юзасидан ретро-проспектив текширувлар ўтказилганда олий тоифали пулмонолог З.Ю. томонидан бир оиланинг 3 аъзосига, аҳволи енгил даражада бўлишига қарамасдан, 12 турдаги дори воситасини («Аскорбин» кислота, «Бактазон», «Моксив», «Дексаметазон», «Вобензим», «Тромбонет», «Курантил», «Ларитидин», «Флюконазол», «Амброксол», «Цинк», «Верошпирон») тавсия қилингани қайд этилди.

Шунингдек, бошқа бир хусусий шифохонада фаолият юритган оториноларингология ихтисослиги бўйича 2-курс клиник ординатори I.Б. айрим беморларга, улар касалликнинг енгил даражасини ўтказаётганига қарамасдан, бир вақтнинг ўзида 10 га яқин («Сефепим», «Ацикловир», «Дексаметазон», «Амброксол», «Клексан», «Курантил», «Кардиомагнил», «Верошпирон») дори воситаларини ҳамда ингаляция учун «Декосан»+«Дексаметазон»+«Димедрол» дори воситалари аралашмаларини тавсия қилган.

Иккала ҳолатда ҳам беморларнинг аҳволи ёмонлашганлиги сабабли улар Республика вирусология илмий текшириш институти клиникасига ётқизилган.

Шунингдек, сўнгги бир ярим ой мобайнида хусусий шифохоналардан биргина Республика шошилинч тиббий ёрдам илмий марказига жами 17 нафар бемор белгиланган даво стандартларига амал қилинмагани, меъёридан ортиқ миқдорда антибиотик ва бошқа тавсия этилмаган турли хил инфузион дори воситалари қўлланилгани учун оғир аҳволда кўчирилгани маълум бўлган. Бу каби беморлар Зангиота туманидаги юқумли касалликлар шифохоналари ва вазирлик тасарруфидаги бошқа даволаш муассасаларига ҳам ётқизилган.

Соғлиқни сақлаш вазирлиги томонидан Тошкент шаҳрида ўтказилган текширув натижалари бўйича 4 та хусусий шифохонага берилган лицензия тугатилди, 2 тасида лицензиянинг амал қилиш муддати 10 кунга тўхтатилди, яна 2 тасига эса камчиликларни бартараф этиш бўйича бажарилиши мажбурий бўлган кўрсатмалар берилди», – дейилади вазирлик ахборот хизматининг хабарида.