Ichki ishlar vazirligi Yo‘l harakati xavfsizligi bosh boshqarmasi Andijon viloyatida soatiga 213 kilometr tezlikda harakatlangan deya jarima rasmiylashtirilgan Damas ishi bo‘yicha ma’lumotlarni e’lon qildi.
Ma’lum bo‘lishicha, 60 O 355 NA davlat raqam belgili Damas egasiga yuqori tezlik 100 kilometr/soat chegaralangan joyda 213 kilometr/soat tezlik bilan harakatlanganligi ko‘rsatilgan ma’muriy bayonnoma yuborilgan.
“Avtomatlashtirilgan tizim, o‘z nomi bilan qoidabuzarliklarni avtomatik tarzda qayd etishga dasturlashgan bo‘lib, texnik xatolikka yo‘l qo‘yilgani ma’lum bo‘ldi.
Surishtiruv davomida Damas egasi fuqaro E.D.ga nisbatan belgilangan jarima solish to‘g‘risidagi qaror O‘zbekiston Respublikasi Ma’muriy javobgarlik to‘g‘risidagi kodeksning 271-modda 1-qismiga asosan bekor qilinganligini ma’lum qilamiz”, – deyiladi YHXBB axborotida.
Bu kabi texnik xatoliklar Andijonda 2018-yildan buyon tez-tez sodir bo‘lib turadi. Ikki yil avval yozda nimadir sabab bilan yurmay qolgan va shu bois ikki kishi tomonidan zo‘r-bazo‘r sudrab ketilayotgan Nexia chorrahadagi kameraga tushgan va qizil chiroqqa to‘xtamagan mashina sifatida avtoulov egasiga jarima tayinlangandi. Qizig‘i, 2017-yilda Toshkentda kameralar yangi ishga tushirilgan vaqtlarda “Daryo” tahririyati xodimlaridan birida ham shunday holat va jarima tayinlangani haqida ma’muriy bayonnomaning kelishi kuzatilgan.
Shuningdek, 2020-yilda vodiyning boshqa bir viloyati Farg‘onada qoidani buzgan Lacetti o‘rniga Cobalt’ga jarima belgilangani, Toshkentda davlat raqami ushbu viloyatniki bo‘lgan va qoidabuzarlik sodir etgan Matiz o‘rniga Spark jarimaga tortilishi kabi holatlar kuzatilgan. Ikkala holatda ham nohaq belgilangan jarimalar fotosuratlar ijtimoiy tarmoqlarda tarqalganidan keyin bekor qilingan.
Izoh (0)