Kanadaning yengil avtomobillarni zirhlash va himoyalangan yo‘ltanlamaslarni ishlab chiqarish bilan shug‘ullanuvchi Inkas firmasi 2020-yilgi Mercedes-Benz Sprinter furgoni bazasida yaratilgan mobil ofisni taqdim etdi. Avtomobil salonida konferensiya va yig‘ilish o‘tkazish, shuningdek, dam olish mumkin, deb xabar beradi Motor.
Sprinter ichi BR6 standarti bo‘yicha zirhlangan (7,62x63 millimetr standartli o‘qlar va ikkita DM 51 granatasining bir vaqtda portlashiga bardosh bera oladi, uning ichiga besh nafar yo‘lovchi sig‘adi. Asosiy zonada ular uchun to‘rtta alohida o‘rindiq va L shaklidagi stol qarshisida yana bitta o‘rindiq joylashgan. Furgon ish jarayonida kerak bo‘ladigan barcha zarur vositalar bilan jihozlangan: WiFi, Bluetooth va bir nechta LED panellar.
Bundan tashqari, Sprinter’ning tom qismida qo‘shimcha yukxona bo‘lmasi, multimedia va audio tizimlari mavjud. Interyer tabiiy charm bilan qoplangan. Mashinaga qo‘shimcha ravishda o‘t o‘chirish tizimi, atrofni to‘liq kuzatish kameralari hamda havo filtrlarini o‘rnatish mumkin.
Mobil ofis 190 ot kuchi va 440 Nm aylanuvchi momentni taqdim etadigan uch litrli V6 dizel dvigateli yordamida harakatga keladi. Dvigatel 7G-Tronic avtomat uzatmalar qutisi yordamida boshqariladi. Inkas ushbu avtomobilning narxi to‘g‘risida ma’lumot bermagan. Barcha qo‘shimcha vositalar mijoz talabidan kelib chiqib o‘rnatiladi, shu sababli yakuniy narxni oldindan aytishning iloji yo‘q.
Izoh (0)